UBT-ǵa baılanysty basy daýǵa qalǵan belgili ázilkesh Tursynbek Qabatovtyń jubaıy Móldir Muqanova jelide jalǵan aqparat taratqandar zań aldynda jaýapsyz qalmaıtynyn, osy ýaqytqa deıin qyzyna, otbasyna til tıgizip, namysyn qorlaǵandardyń zańmen jazalanatynyn eskertti. Bul týraly ol óziniń áleýmettik jelisindegi paraqshasynda jazdy, dep habarlaıdy "Adyrna" ulttyq portaly.
Bala degende árbir áke-shesheniń shyǵar jany bólek. Dál qazir bizdiń otbasymyzǵa jasalyp jatqan aqparattyq shabýylǵa únsiz qalyp otyrǵan joqpyz. Biz iske kóshtik. Jaqynda aq-qarasyn dálelmen ajyratyp, halyq aldynda esep beremiz. Tek ýaqyt kerek. Ómirde jalǵan jala arqalaǵannan asqan soraqylyq joq eken. Dál qazir meniń ana retinde júregim qars aıyrylyp júr. Ózimizdiń qazaq baýyrlarymyzdyń bizdi "halyq jaýy" etip kórsetýge sonsha talpynyp jatqany kúıindiredi — dep jazdy Móldir Muqanova.
Ol jaqyn arada ashyq turǵan jaramyzǵa tuz seýip, bizben qosa balamyzdy ay sóz, jalǵan aqparatpen tunshyqtyryp jatqan áleýmettik jeli belsendilerine nalımyn dep otyr.
Birińdi qazaq, biriń dos, kórmeseń istiń bári bos" — dep Abaı babamyz keltirgen joldar qaı kezde de ózekti. Qazaqty jyǵyp beretin, jyǵylǵan kezde judyryq beretin de óz qazaǵymyz. Halyq aldynda upaı jınaý úshin, ohvat pen laık sanyn kóterý úshin teris aqparat taratqan, jeke bastyń quqyǵyn taptaǵan, boıjetkenge til tıgizgen ár bloger, jazýshy, jeli belsendisi zań aldynda jaýapsyz qalmaıdy. Ómirge ókpeli adamdar ózgelerdi sókkisi keledi de otyrady. Alla olardyń balalaryna jar bolsyn! Rýhanııatqa bet buryp, ómirden “mán” izdegender ózgeniń balasyna aýyr sóz aıtpas edi — dep málimdedi Tursynbektiń jubaıy.
Aıta keteıik, buǵan deıin belgili zańger, advokat Abzal Quspan Ádemi Tursynbekqyzynyń ornyna testileýge Eýrazııa ulttyq ýnıversıtetiniń ekinshi kýrs stýdenti, grantta oqyp júrgen Symbat Qanaı test tapsyrýǵa kirgenin óz paraqshasynda jazǵan bolatyn. Kóp uzamaı buǵan baılanysty Tursynbek Qabatov ózi bul aqparatqa qatysty túsinik berip, bolǵan jaıtty rastady. Alaıda ázilkesh bul isten beıhabar ekenin jáne zańbuzýshylyqqa qyzyn testke ázirlegen bilim ortalyǵynyń mamandary kináli ekenin aıtty. Keıin ázilkeshtiń qyzyn UBT-ǵa daıyndaǵan repetıtor da bar shyndyqty ortaǵa jaıyp saldy. Ol oqıǵanyń qalaı bolǵanyn da jasyrmaı aıtyp bergen edi.
"Adyrna" ulttyq portaly
