Qaraǧandyda Qazaqstan Respublikasy Täuelsızdıgınıŋ 30 jyldyǧy aiasynda Qazaq küntızbesındegı aişyqty data Qazaq handyǧynyŋ qalypqa keltırılgenıne 180 jyl tolu qūrmetıne orai taǧylymy mol şaralar ötedı, dep habarlaidy "Adyrna" ūlttyq portalynyŋ tılşısı.
Qazaq memlekettılıgın qalpyna keltıru jaily söz bolǧanda almaǧaiyp kürdelı kezeŋde Täuelsızdık üşın küresıp,qazaq degen köşpelı jūrttyŋ tuyn jyqpai, sanaly ǧūmyryn at üstınde ötkızgen ūlt qairatkerlerı Kenesary han, Älımhan Ermek, Älihan Bökeihan, Ahmet Baitūrsyn,Mūstafa Şoqai, Mūhametjan Tynyşpaev jäne basqa da ūlylarymyz eske tüsedı.
Olardyŋ bırı qazaqtyŋ batyrlar institutyna tän küreskerlık joldy taŋdasa, endı bırı saiasi, diplomatiialyq jolmen qazaq memlekettılıgın qalpyna keltıruge üles qosty. Ūlt qairatkerlerınıŋ būl eŋbekterı zaia ketken joq. 1841 jyldyŋ qyrküiegınde barşa qazaq rulary Kenesary Qasymūlyn aq kiızge köterıp, han sailady. Osy arqyly qazaq halqynyŋ memlekettılıgı Abylai han qaitys bolǧannan keiın 60 jyl ötken soŋ qaita jaŋǧyrdy.
2021 jyldyŋ qyrküiegınde osy tarihi mänı tereŋ oqiǧaǧa 180 jyl tolady. Jalpy alǧanda Qazaq memlekettılıgın jaŋǧyrtu jolynda qazaq şekarasyn belgıleuge qatysqan Ä.Ermektıŋ, 1917 jyly qūrylǧan Alaşorda ükımetınıŋ basşysy bolǧan Älihan Bökeihannyŋ, 1917 jyly qūrylǧan Türkıstan avtonomiiasynyŋ bastauynda tūrǧan Mūhammedjan Tynyşpai jäne Mūstafa Şoqaidyŋ eŋbekterı zor. Būl tarihi kündı keler ūrpaqqa nasihattau maqsatynda Qazaq küntızbesındegı 15 qyrküiek Qazaq memlekettılıgı qalpyna keltırılgen kün bolyp belgılendı.
Osy aituly datany atap ötu maqsatynda qalalyq Änet baba meşıtınde ūlt Täuelsızdıgı üşın küresken tūlǧalarǧa arnap qūran oqyldy. Ūiymdastyruşy N.Sūrşaūlynyŋ sözınşe mūndai tarihi datalardy ūlyqtau, ärı olardy jas ūrpaqqa nasihattau jastar tarapynan ūlttyq tarihqa degen qyzyǧuşylyqty oiatady. Sondai-aq atalǧan şaraǧa qoǧamdyq negızde qūrylǧan ūlttyq jobalardy qarjylandyrudy maqsat tūtatyn "Qazaq jıgıtterı jäne Qazaq qyzdary" mesenattar kluby qoldau bıldırdı.
Aita ketu kerek, "Qazaq halqynyŋ mūrasy-Mäŋgılık el" kıtaptar seriiasy jobasy aiasynda jūrtşylyqqa būǧan deiın Täuelsızdık lentasy, Jauyngerlık Daŋq lentasy men Qazaq küntızbesı siiaqty bıregei jobalar ūsynylǧan bolatyn. 15 qyrküiekten bastau alatyn şaralar aidyŋ aiaǧyna deiın jalǧasady dep josparlanuda.
"Adyrna" ūlttyq portaly
