Toqaev: Áskerı qyzmetkerlerdiń jalaqysy 60 paıyzǵa ósedi

2736

Memleket basshysy Mańǵystaý oblysyna jumys sapary barysynda «Oımashy» polıgonynda ótken «Otpantaý-2021» shuǵyl-strategııalyq komandalyq-shtabtyq áskerı oqý-jattyǵý jıynyna bardy, dep habarlaıdy «Adyrna» tilshisi Aqordaǵa silteme jasap.

Joǵarǵy Bas qolbasshy oqý-jattyǵý jıyndary elimizdiń ártúrli óńirinde ornalasqan jeti oqý-jattyǵý polıgonynda jáne Kaspıı aıdynynda ótkenin atap ótti. Jalpy oqý-jattyǵý jıyndary shyǵystan batysqa qaraı úsh myń shaqyrym aýmaqty qamtydy.

– Jeke quram men tehnıkany óz júristerimen, temirjol jáne áýe qatynastary arqyly jyljytý jumystary pysyqtaldy. Bul Qarýly Kúshterdiń strategııalyq utqyrlyǵyn, qaýip tóndiretin negizgi baǵyttar boıynsha áskerı toptardy jedel qurý múmkindigin kórsetti. Shtabtardyń shuǵyl jaǵdaılar kezindegi úılesimdi jumysyn, joǵary tehnologııaly qarýlar men áskerı is-qımyldardy josparlaý ádistemeleriniń qoldanylýyn kórdik. Ákimdikterdiń de daıyndyq deńgeıiniń joǵarylaǵanyna kýá boldyq. Qazirgideı «stress-testileý» kezinde olardyń róli áskerı quramdardan kem túspeıdi, – dedi Qasym-Jomart Toqaev.

Ol áskerı qyzmetshilerge keshendi áleýmettik qoldaý kórsetý máselelerine de toqtaldy.

– Qarjylandyrý máselesi kezeń-kezeńimen artyp keledi. Bıyldan bastap áskerı qyzmetshilerdiń laýazymdyq eńbekaqylary 35 paıyzǵa ósti. Aldaǵy eki jylda ortasha eseppen 60 paıyzǵa joǵarylaıdy. Barlyq sanattaǵy áskerı qyzmetshiler úshin turǵyn úı máselesi zańnamalyq turǵydan sheshilgen. TMD-nyń basqa elderine qaraǵanda qazaqstandyq áskerdiń áleýmettik toptamasy – básekege qabiletti. Áskerı qyzmetshilerdi áleýmettik qorǵaý máselesi árdaıym memleket basymdyq beretin salalardyń qatarynda bolady. Kúshti ásker – qýatty egemen Qazaqstannyń kepili, – dedi Prezıdent.

«Adyrna» ulttyq portaly

Pikirler
Redakııa tańdaýy