Eki altyn, bir kúmis, eki qola jeńip alǵan kıkboksshylardy atyraýlyqtar halyqaralyq áýejaıdan zor qurmetpen kútip aldy.
Býdapesht tórinde altyn medal ıelengen Azamat Ótemisov 67 keli salmaqta óner kórsetti. Álem kýbogin ekinshi márte jeńip alǵan Azamat Ótemisov Vengrııada qarsylastaryn aıqyn basymdyqpen tize búktirdi.
«Jarys ońaı bolǵan joq. Qarsylastarym joǵary deńgeıde daıyndyqpen kelgen. Olardyń kásibı deńgeıleri qaı aıqasta da baıqalyp turdy. Biz Vengrııa tórinde elimizdiń Kók Týyn jelbiretý úshin bar kúshimizdi saldyq. Jeńisimizdi Táýelsizdigimizdiń 30 jyldyǵyna arnaımyz» deıdi álem kýboginiń altyn medal ıegeri Azamat Ótemisov.
51 keli salmaqta óner kórsetip, altyn medaldi jeńip alǵan atyraýlyq sportshynyń biri Nursultan Jumabaev. Qazaqstannyń namysyn abyroımen qorǵaǵan Roman Zýbarev (51 keli) kúmis júldege ıe boldy. Qola júldeni Janáli Sálimgereı (57 keli) men Serikjan Sálimgereev (67 keli) jeńip aldy.
Eske sala ketelik, Vengrııa astanasy Býdapesht qalasynda ótken kıkboksıngten 26-shy Álem kýbogyna 45 elden 3000-nan astam sportshy qatysty.
