Qazaqstan täuelsızdık alǧannan berı 30 jyl uaqyt öttı. Täuelsız el bolsaq ta, Qostanai oblysyndaǧy 3 auyl 30 jyl boiy auyz susyz ömır sürıp kele jatyr. Sondai-aq, 220 auyl sudy kezekpen alady, dep habarlaidy “Adyrna” ūlttyq portaly.
Körşıles Aqmola oblysynan temırjol arqyly jetkızıledı eken. Biyl ǧana susyz kün körıp kele jatqan eldı-mekenderdı sumen qamtamasyz etu jobasy düniege kelgen. Alaida ony jüzege asyru üşın 500 mln teŋge qarajat qajet. Merdıger būl somanyŋ besten bırın ǧana igergen. Audandyq äkımdık qarajat jaǧynan mäseleler bar ekenın tüsındırdı.
Būl auylda bügıngı taŋda 2000-ǧa juyq tūrǧyn bar. Köbı su tapşylyǧynan qiyndyq körıp köşıp ketken. Adamdar kezekke tūryp su alady.
“ Suǧa kelıp tūrmyn. Üide joq. Esıgın qaqsam jabyq. Arasyna saǧat salyp beredı. Taŋerteŋ bırneşe saǧat, keşke bırneşe. Jūmysqa da ülgermei qalatyn uaqyttar bolady. Qiyn...”,- dedı Troebratskoe auylynyŋ tūrǧyny Moskvin.
Auyl tūrǧynynyŋ sözınşe, jazda asa qatty qiynşylyq tuyndamaidy. Alaida, qysta qiyn. Äkımdıktegıler biyl būl mäsele şeşıledı dep uäde etude. Joba 2 jylǧa sozylady.
Būl arada Qostanai oblysynyŋ basqa eldı mekenderın sumen qamtamasyz etude de problemalar bar. Ekı jyl ışınde oblys bilıgı 46 myŋnan astam adam tūratyn 220 auylda importtalatyn suǧa moduldık taratu nüktelerın ornatudy josparlap otyr. Al eger joba jüzege asatyn bolsa, onda auyl tūrǧyndarynyŋ 82%-y sapaly auyz sumen qamtamasyz etıledı.
https://youtu.be/97mLY613lsM“Adyrna” ūlttyq portaly
