Qazaqstan táýelsizdik alǵannan beri 30 jyl ýaqyt ótti. Táýelsiz el bolsaq ta, Qostanaı oblysyndaǵy 3 aýyl 30 jyl boıy aýyz sýsyz ómir súrip kele jatyr. Sondaı-aq, 220 aýyl sýdy kezekpen alady, dep habarlaıdy “Adyrna” ulttyq portaly.
Kórshiles Aqmola oblysynan temirjol arqyly jetkiziledi eken. Bıyl ǵana sýsyz kún kórip kele jatqan eldi-mekenderdi sýmen qamtamasyz etý jobasy dúnıege kelgen. Alaıda ony júzege asyrý úshin 500 mln teńge qarajat qajet. Merdiger bul somanyń besten birin ǵana ıgergen. Aýdandyq ákimdik qarajat jaǵynan máseleler bar ekenin túsindirdi.
Bul aýylda búgingi tańda 2000-ǵa jýyq turǵyn bar. Kóbi sý tapshylyǵynan qıyndyq kórip kóship ketken. Adamdar kezekke turyp sý alady.
“ Sýǵa kelip turmyn. Úıde joq. Esigin qaqsam jabyq. Arasyna saǵat salyp beredi. Tańerteń birneshe saǵat, keshke birneshe. Jumysqa da úlgermeı qalatyn ýaqyttar bolady. Qıyn...”,- dedi Troebratskoe aýylynyń turǵyny Moskvın.
Aýyl turǵynynyń sózinshe, jazda asa qatty qıynshylyq týyndamaıdy. Alaıda, qysta qıyn. Ákimdiktegiler bıyl bul másele sheshiledi dep ýáde etýde. Joba 2 jylǵa sozylady.
Bul arada Qostanaı oblysynyń basqa eldi mekenderin sýmen qamtamasyz etýde de problemalar bar. Eki jyl ishinde oblys bıligi 46 myńnan astam adam turatyn 220 aýylda ımporttalatyn sýǵa modýldik taratý núktelerin ornatýdy josparlap otyr. Al eger joba júzege asatyn bolsa, onda aýyl turǵyndarynyń 82%-y sapaly aýyz sýmen qamtamasyz etiledi.
“Adyrna” ulttyq portaly
