AQSh -tyń halyqaralyq dinı bostandyq jónindegi komıssııasy jańa esepti jarııalady, onda Ózbekstan dinı senimi úshin 2 myń adamdy túrmege qamaǵany aıtylǵan dep habarlaıdy "Adyrna" ulttyq portaly "centralasia.media" saıtyna silteme jasap.
Baıandamada Ózbekstan túrmelerinde 2000 -nan astam dinı tutqyn ustalǵany, olardyń 81-iniń kim ekendigi aıtylǵan.
Baıandamanyń avtory, kongrestiń Ortalyq Azııadaǵy adam quqyqtary jónindegi baıandamashysy Stıv Sverdlov 81 dinge senýshiniń kópshiliginiń azaptalǵanyn nemese basqalaı qorlanǵanyn aıtty. AQSh-tyń dinı bostandyq jónindegi komıssııasynyń baıandamasy "Ózbekstannyń dinı jáne saıası tutqyndary: repressııa praktıkasyn joıý" dep atalady.
Onda elde beıbit namaz úshin qamalǵan dinı tutqyndardyń naqty sany burynnan jýrnalısterge, quqyq qorǵaýshylarǵa, AQSh úkimetine, Eýropalyq Odaq pen BUU -ǵa belgisiz ekeni aıtylady.
Ózbekstan úkimeti mundaı tutqyndardyń sany men jeke basy týraly aqparattardy eshqashan aıtpaǵan.
Esep avtory Stıv Sverdlov Ózbekstan burynǵy Keńes Odaǵyndaǵy dindar tutqyndary eń kóp elge aınalǵanyn jetkizdi: "2000 -nan astam dinge senýshi temir tordyń artynda", - dedi ol.
Baıandama avtory osy sottalýshylarǵa taǵylǵan aıypqa nazar aýdarady. Bul sottalǵandardyń kóbine "eldiń konstıtýııalyq qurylysyn qulatý", "tyıym salynǵan ádebıetterdi saqtaý nemese taratý" jáne "tyıym salynǵan dinı toptarǵa múshelik" sııaqty qylmystar boıynsha aıyp taǵylǵan.
Eń bastysy, baıandamada anyqtalǵan 81 dinı tutqynǵa qatysty mundaı aıyptaýdy rastaıtyn naqty dálel joq.
Stıv Sverdlovtyń aıtýynsha, Ózbekstannyń Qylmystyq kodeksinde osyndaı sottalǵan adamdarǵa berilgen kóptegen baptar bar, olardyń kópshiligi Ózbekstannyń halyqaralyq quqyqtyq mindettemelerine qaıshy keledi.
"Ózbekstannyń Qylmystyq kodeksi Karımov kezinde bolǵan kúıinde qalyp otyr. Sondyqtan másele áli de bar", - dedi baıandama avtory.
"Adyrna" ulttyq portaly.
