Ulttyq jobalarǵa túzetýler engizilýi múmkin. Biraq bólingen qarajat pen kútiletin nátıjesi ózgertilmeıdi. QR Prezıdenti Ákimshiligi basshysynyń birinshi orynbasary Dáýren Abaev «Ashyq dıalog-2» suhbatynyń kezekti sanynda osyndaı pikir bildirdi, dep habarlaıdy «Adyrna» tilshisi QazAqparatqa silteme jasap.
«Ulttyq jobalardyń taǵy bir erekshe súzgisi – adamdarǵa baǵyttalýynda. Memleket basshysy bul týraly da aıtqan bolatyn. Osynaý 10 ulttyq joba negizgi qoǵamdyq ıgilik dep aıtýǵa bolady. Onyń árbir azamatqa qatysy bar. Ár azamattyń turmysyn, ómirine qanaǵattaný deńgeıin, bilimi men densaýlyǵyn, ekologııany, memlekettik qyzmetterdi, qaýipsizdikti, tipti dastarhandaǵy asymyzǵa deıin osy Ulttyq jobalar aıqyndaıdy. Azamattar bul arqyly Úkimettiń áreketteri olardyń kúndelikti shyndyǵymen qanshalyqty sáıkesetinin túsinýi kerek», - dedi Prezıdent ákimshiligi basshysynyń birinshi orynbasary.
Sondaı-aq, ol jobalardyń iske asýyn Prezıdent Ákimshiligi qadaǵalap, qajet bolsa Prezıdent tapsyrmasymen túzetýler engizilip otyratynyn aıtty.
«Birinshiden, Ulttyq jobalardyń iske asyrylýyna Prezıdent ákimshiligi tarapynan da, jobalyq keńse tarapynan da turaqty monıtorıng júrgiziledi. Bul turǵyda Ulttyq jobalar áldeqaıda ıkemdi qural deýge bolady. Ondaǵy kez kelgen dúnıeni ózgertýge bolady. Tek kútiletin nátıjeler men bólingen qarajatty ǵana ózgertýge bolmaıdy. Onyń ústine Ulttyq jobalardyń iske asýyna jalpy saıasat turǵysynan Prezıdenttiń kóńili tolmasa, túzetý engizý úshin tapsyrmalar bere alady. Bul Joldaý nemese Úkimettiń keńeıtilgen otyrystary aıasynda jarııa túrde de, jekelegen tapsyrmalar túrinde de aıtylýy múmkin», - dedi Dáýren Abaev.
