QAJ komitetı Medisinalyq qamtamasyz etu bölımınıŋ qyzmetkerı Güljan Mūsabaeva penitensiarlyq jüienıŋ tarihynda alǧaş ret oryn alǧan büirek jetıspeuşılıgınen transplantasiia jasalǧany turaly aityp berdı, dep habarlaidy «Adyrna» tılşısı Polisia.kz-ke sılteme jasap.
Ädılet maiory qylmystyq-atqaru jüiesı organdaryndaǧy qyzmetın 2014 jyldan berı atqaryp keledı. Ol qyzmet barysynda sottalǧandardyŋ da, olardyŋ tuystarynyŋ da köptegen ötınışterın qaraǧanyn aitady. Olardyŋ ärqaisysy jeke-dara qaraudy qajet etedı, onyŋ arasynda penitensiarlyq jüiege tän emes jaǧdailar da kezdesıp otyrady. 2018 jyldyŋ säuır aiynda Komitetke jazasyn ötep jatqandardyŋ bırınıŋ jūbaiynan ötınış kelıp tüstı. Ol öz hatynda şūǧyl türde büirek transplantasiiasyn qajet etetın tört jasar ūlyna donorlyq kömek körsetudı sūrady.
– Işkı organdardy transplantasiialau, iaǧni būl jaǧdaida büirek transplantasiiasy nauqas adamnyŋ aǧzasymen üilesetın denı sau donordyŋ boluyn bıldıredı. Köbınese biologiialyq ata-analardyŋ özderı donor bolyp tabylady, öitkenı eresek adam üşın de, bala üşın de tırşılık äreketın qoldau üşın kem degende bır büirektıŋ boluy jetkılıktı, – deidı Güljan Mūsabaeva.Ol uaqytta balanyŋ tuǧan äkesı Şyǧys Qazaqstan oblysy boiynşa QAJ departamentıne qarasty ortaşa qauıpsız mekemede jazasyn ötep jatty.
– Balanyŋ auyr halın eskere otyryp, bız dereu sottalǧandy tiıstı saraptamalardan ötkızuge kırıstık. Būl jūmysqa bızge Ana men bala ūlttyq ǧylymi ortalyǧy kömektestı, onda mamandardyŋ baqylauymen jas pasient bızdı küttı, – dep qosty maior.Sottalǧandy elordaǧa jetkızu jazasyn ötep jatqan mekemenıŋ jäne QAJ komitetı qyzmetkerlerınıŋ kömegımen jüzege asyryldy. Delegasiia qūramyna Güljan Mūsabaeva da kırdı, ol aidauyldaudy basqardy, Ana men bala ŪǦO därıgerlerımen jäne balanyŋ anasymen bailanysta boldy.
– Negızgı diagnostikalyq ıs-şaralar sottalǧannyŋ aǧzasynyŋ odan ärı transplantasiialauǧa üilesımdılıgı men jaramdylyǧyn körsettı. Ota sättı ötıp, pasientterdıŋ jaǧdaiy köp ūzamai qalypqa keldı. Sottalǧan jazasyn odan ärı öteu üşın koloniiaǧa qaita jetkızıldı, – dep qorytyndylady Mūsabaeva.Bır büiregın balasyna bergen azamat bas bostandyǧynan aiyru oryndarynan ötken jyly bosatyldy.
«Adyrna» ūlttyq portaly
