«Nur Otan» partiiasy janyndaǧy Azamattyq qoǧamdy jäne memlekettık basqarudy damytu jönındegı respublikalyq qoǧamdyq keŋestıŋ kezektı otyrysynda jauapty azamattyq qoǧamdy damytu baǧytyndaǧy atqarylǧan jūmystar jäne jaqynda ötken auyl äkımderı sailauynyŋ aralyq qorytyndysy talqylandy.
Partiianyŋ Jol kartasynda el damuynyŋ özektı mındetterı men mäselelerın şeşu üşın biyl respublika boiynşa 1700 azamattyq belsendı tartu közdelgen. Olardyŋ qūramynda är öŋırdegı bedeldı saiasatkerler, sarapşylar, BAQ, ÜEŪ t.b. sala ökılderı bar.
Aqparat jäne qoǧamdyq damu vise-ministrı Bolat Tlepovtıŋ aituynşa, barlyq öŋırde jergılıktı atqaruşy organdar azamattyq belsendılerdıŋ derekter bazasyn jasaqtaǧan. Būl rette ol Qoǧamdyq keŋesterdıŋ 2015 jyly Elbasynyŋ «5 institusionaldyq reformasy» aiasynda qūrylǧannan berı qoǧam men bilıktıŋ arasyn jalǧauşy retınde özınıŋ tiımdılıgın körsetkenın atap öttı. Qazır elımız boiynşa 249 Qoǧamdyq keŋes jūmys ıstese, olar barlyq ortalyq memlekettık organdarda, oblys, qala men audan äkımdıkterınde qūrylǧan.
«Osy 5 jylda 20 myŋnan astam normativtık qūjat qoǧamdyq keŋesterdıŋ saraptamasynan ötken bolsa, sonyŋ ärbır onynşysy keiın qaitaryldy. Iаǧni, azamattardyŋ müddesıne tıkelei äser etetın būl qūjattardyŋ kemşılıgı der kezınde anyqtaldy. Jyl saiyn 1500-den asa türlı memlekettık organnyŋ basşylary qoǧamdyq keŋester aldynda esep beredı. Sondai-aq, qoǧamdyq keŋester jürgızetın monitoring memlekettık qyzmetter sapasynyŋ artuyna oŋ äser etude. Monitoring aiasynda äleumettık maŋyzdy taqyryptar boiynşa 1000-nan astam zertteu jürgızıldı», - dedı ol.Öz kezegınde «Atameken» ŪKP Basqarma töraǧasy Abylai Myrzahmetov qoǧamdyq keŋester qūramynyŋ sapasyna nazar audardy.
«Qoǧamdyq keŋestıŋ müşelerı – oiyn aşyq aitatyn belsendı, tanymal azamattar. Bıraq, olardyŋ barlyǧy bırdei memlekettık satyp alu, audit jürgızu siiaqty salalardyŋ tetıkterın bıle bermeidı. Sondyqtan olarǧa, äsırese, kvazimemlekettık sektordaǧy qoǧamdyq keŋesterdıŋ qūramyna kıretın azamattarǧa arnaiy seminarlar ötkızıp, biudjet, audit, qarjy salalaryn oqytqan jön bolady. Sonda qoǧamdyq keŋesterdıŋ äleuetı artyp, qūzyretı keŋeiedı», - degen A.Myrzahmetov būl ıske «Atameken» ŪKP atsalysuǧa daiyn ekenın jetkızdı.Keŋes töraǧasy Aidos Sarym būl baǧyttaǧy «Nur Otan» partiiasy janynan qūrylǧan 14 respublikalyq jäne 1,7 myŋ aimaqtyq qoǧamdyq keŋes jūmysyn atap öttı. Bügınge deiın ötkızılgen respublikalyq keŋestıŋ 50-ge juyq otyrysynda 80-nen astam mäsele qaralyp, memlekettık organdarǧa 650-den asa ūsynym joldandy. Al, aimaqtyq keŋesterde 5 myŋnan asa otyrys ötıp, onda 9,3 myŋ mäsele qaralǧan. Nätijesınde, 15 myŋ ūsynys memlekettık organdarǧa joldandy. Sondai-aq, Azamattyq qoǧamdy jäne memlekettık basqarudy damytu jönındegı respublikalyq qoǧamdyq keŋestıŋ alaŋynda auyl äkımderınıŋ tıkelei sailauynyŋ aralyq qorytyndysy talqylandy. Ūlttyq ekonomika vise-ministrı Älışer Äbdıqadyrovtyŋ aituynşa, sailauǧa 2403 kandidat (bır orynǧa üş ümıtkerden) qatysyp, 784 äkım sailanǧan. Kandidattardyŋ 60%-y özın-özı ūsynsa, 40%-y saiasi partiialardyŋ atynan tüsken. Sailanǧan äkımderdıŋ teŋ jartysy – būryn būl qyzmette bolmaǧan jaŋa tūlǧalar. Auyl äkımderınıŋ sailauyna qatysty belgılı saiasattanuşy Rasul Jūmaly öz oiyn ortaǧa saldy.
«Jazda sailau nauqany belsendı öttı. Äsırese, «Nur Otan»-nyŋ basqa saiasi partiialarmen salystyrǧanda keşendı jūmys atqarǧanyn atap ötu kerek. Auyl äkımderın sailau jalǧasyp jatqanda öŋırlerdıŋ qarqyndy bäseŋdetpegenı jäne nauqanǧa, ümıtkerlerge qatysty barlyq aqparatty büge-şügesıne deiın naqty, uaqtyly alyp otyratyn tiıstı tetıkterdı qarastyrǧan jön», - dedı Keŋes müşesı, belgılı saiasattanuşy Rasul Jūmaly.
«Adyrna» ūlttyq portaly
