«Nur Otan» partııasy janyndaǵy Azamattyq qoǵamdy jáne memlekettik basqarýdy damytý jónindegi respýblıkalyq qoǵamdyq keńestiń kezekti otyrysynda jaýapty azamattyq qoǵamdy damytý baǵytyndaǵy atqarylǵan jumystar jáne jaqynda ótken aýyl ákimderi saılaýynyń aralyq qorytyndysy talqylandy.
Partııanyń Jol kartasynda el damýynyń ózekti mindetteri men máselelerin sheshý úshin bıyl respýblıka boıynsha 1700 azamattyq belsendi tartý kózdelgen. Olardyń quramynda ár óńirdegi bedeldi saıasatkerler, sarapshylar, BAQ, ÚEU t.b. sala ókilderi bar.
Aqparat jáne qoǵamdyq damý vıe-mınıstri Bolat Tlepovtiń aıtýynsha, barlyq óńirde jergilikti atqarýshy organdar azamattyq belsendilerdiń derekter bazasyn jasaqtaǵan. Bul rette ol Qoǵamdyq keńesterdiń 2015 jyly Elbasynyń «5 ınstıtýıonaldyq reformasy» aıasynda qurylǵannan beri qoǵam men bıliktiń arasyn jalǵaýshy retinde óziniń tıimdiligin kórsetkenin atap ótti. Qazir elimiz boıynsha 249 Qoǵamdyq keńes jumys istese, olar barlyq ortalyq memlekettik organdarda, oblys, qala men aýdan ákimdikterinde qurylǵan.
«Osy 5 jylda 20 myńnan astam normatıvtik qujat qoǵamdyq keńesterdiń saraptamasynan ótken bolsa, sonyń árbir onynshysy keıin qaıtaryldy. Iaǵnı, azamattardyń múddesine tikeleı áser etetin bul qujattardyń kemshiligi der kezinde anyqtaldy. Jyl saıyn 1500-den asa túrli memlekettik organnyń basshylary qoǵamdyq keńester aldynda esep beredi. Sondaı-aq, qoǵamdyq keńester júrgizetin monıtorıng memlekettik qyzmetter sapasynyń artýyna oń áser etýde. Monıtorıng aıasynda áleýmettik mańyzdy taqyryptar boıynsha 1000-nan astam zertteý júrgizildi», - dedi ol.
Óz kezeginde «Atameken» UKP Basqarma tóraǵasy Abylaı Myrzahmetov qoǵamdyq keńester quramynyń sapasyna nazar aýdardy.
«Qoǵamdyq keńestiń músheleri – oıyn ashyq aıtatyn belsendi, tanymal azamattar. Biraq, olardyń barlyǵy birdeı memlekettik satyp alý, aýdıt júrgizý sııaqty salalardyń tetikterin bile bermeıdi. Sondyqtan olarǵa, ásirese, kvazımemlekettik sektordaǵy qoǵamdyq keńesterdiń quramyna kiretin azamattarǵa arnaıy semınarlar ótkizip, bıýdjet, aýdıt, qarjy salalaryn oqytqan jón bolady. Sonda qoǵamdyq keńesterdiń áleýeti artyp, quzyreti keńeıedi», - degen A.Myrzahmetov bul iske «Atameken» UKP atsalysýǵa daıyn ekenin jetkizdi.
Keńes tóraǵasy Aıdos Sarym bul baǵyttaǵy «Nur Otan» partııasy janynan qurylǵan 14 respýblıkalyq jáne 1,7 myń aımaqtyq qoǵamdyq keńes jumysyn atap ótti. Búginge deıin ótkizilgen respýblıkalyq keńestiń 50-ge jýyq otyrysynda 80-nen astam másele qaralyp, memlekettik organdarǵa 650-den asa usynym joldandy. Al, aımaqtyq keńesterde 5 myńnan asa otyrys ótip, onda 9,3 myń másele qaralǵan. Nátıjesinde, 15 myń usynys memlekettik organdarǵa joldandy.
Sondaı-aq, Azamattyq qoǵamdy jáne memlekettik basqarýdy damytý jónindegi respýblıkalyq qoǵamdyq keńestiń alańynda aýyl ákimderiniń tikeleı saılaýynyń aralyq qorytyndysy talqylandy. Ulttyq ekonomıka vıe-mınıstri Álisher Ábdiqadyrovtyń aıtýynsha, saılaýǵa 2403 kandıdat (bir orynǵa úsh úmitkerden) qatysyp, 784 ákim saılanǵan. Kandıdattardyń 60%-y ózin-ózi usynsa, 40%-y saıası partııalardyń atynan túsken. Saılanǵan ákimderdiń teń jartysy – buryn bul qyzmette bolmaǵan jańa tulǵalar.
Aýyl ákimderiniń saılaýyna qatysty belgili saıasattanýshy Rasýl Jumaly óz oıyn ortaǵa saldy.
«Jazda saılaý naýqany belsendi ótti. Ásirese, «Nur Otan»-nyń basqa saıası partııalarmen salystyrǵanda keshendi jumys atqarǵanyn atap ótý kerek. Aýyl ákimderin saılaý jalǵasyp jatqanda óńirlerdiń qarqyndy báseńdetpegeni jáne naýqanǵa, úmitkerlerge qatysty barlyq aqparatty búge-shúgesine deıin naqty, ýaqtyly alyp otyratyn tıisti tetikterdi qarastyrǵan jón», - dedi Keńes múshesi, belgili saıasattanýshy Rasýl Jumaly.
