Almaty oblysy Panfılov aýdanyna qarasty Penjim aýylynda mektep oqýshylary arasynda bolǵan jappaı tóbeles áleýmettik jelige tarap ketti. Qazaq pen uıǵyr ulty arasynda jıi bolyp turatyn "tóbeles" neden shyqty? Oqıǵaǵa baılanysty resmı tulǵalar jaýap berdi dep habarlaıdy "Adyrna" ulttyq portaly.
Polıııa aqparatyna súıensek, 27 qazanda Panfılov aýdanyndaǵy ortalyq aýrýhanaǵa dene jaraqatymen 16 jastaǵy oqýshy jetkizilgen. Tekseris kezinde 9, 10, 11-synyp oqýshylary arasynda eregis bastalyp, 20 shaqty jas tóbeleskeni anyqtaldy. Onyń ishinde eki adam zardap shekken.
Bas dárigerdiń orynbasary Erjan Qojahmetovtiń aıtýynsha, 2005 jyly týǵan jasóspirim Panfılov aýdanaralyq kópsalaly aýrýhanaǵa túsken. Ol mıdyń aýyr jaraqatyn alǵan, oǵan ekinshi ne úshinshi dárejeli travmatıkalyq shok dıagnozy qoıylǵan.
Osy oqıǵadan keıin Penjim aýylyna jetken bir top bılik ókili jergilikti turǵyndarmen jınalys ótkizdi. Panfılov aýdanynyń ákimi Talǵat Ómirálıev bastaǵan ákim-qaralar jınalǵan jurttyń pikirin tyńdap, basý aıtý úshin ertip kelgen qoǵam qaıratkerleri men aqyndarǵa da sóz berildi.
T.Ómirálıevtiń aıtýynsha, budan astar izdeýdiń qajeti joq, bul – jaı ǵana buzaqylyq áreket.
"Rozybaqıev atyndaǵy mektepte balalar tóbelesip, bir bala jaraqat aldy. Ol balanyń jaǵdaıyn kórip shyqtym. Túnde ota jasalypty. Basyndaǵy gematomany alyp tastady. Bul jerde eshqandaı ulttyq másele joq. Oblys ákiminiń tapsyrmasymen arnaıy shtab quryldy. Bul jaǵdaıdyń bolýyna ne alyp keldi? Bárin tekseremiz. Aýyldyń azamattaryn jınap, pikirin bilip jatyrmyz", – dedi ol.
Al aýyl azamaty Aýtjan Hamraev eldi mekendegi barlyq ult ókilderi búginge deıin tatý-tátti turyp jatqanyn, aldaǵy ýaqytta ózara aýyzbirshilikti saqtaýda birlesip eńbek etip, balalardy sabyrǵa, ózara dostyqqa shaqyrýǵa úndedi.
"Keshe bolǵan oqıǵany keıbir adamdar basqa jaǵynan áleýmettik jelide kórsetip jatyr. Tipti, kezdeısoq órttiń ózi keshegi oqıǵanyń saldary sııaqty kórsetildi. Biraq bul olaı emes, muny bárińiz bilesizder. Jastar, bir-birińdi qurmetteńder. Biz bir jerden, bir eldenmiz. Biz — úlken otbasymyz", — dedi aýyl turǵyny.
"Adyrna" ulttyq portaly
