Qytaıdyń Altaı aımaǵynda turatyn qandasymyz Silámbek Saǵynyshuly qazaqtyń baıyrǵy teri shańǵysy qalaı jasalatynyn aıtyp berdi, dep habarlaıdy Baq.kz aqparat agenttigi.
Bul týraly Qytaıda jaryq kóretin «Halyq gazetine» silteme jasap QazAqparat agenttigi jazdy. Qazaq qundylyǵyn qunttap júrgen Silámbek Saǵynyshuly Altaıdyń Lasty kentiniń Noǵaıty aýylynda turady.
Ol áli de kóne muramyzdyń otyn óshirmeı jalǵastyryp kele jatqanyn, sondaı-aq, arnaıy shákirt tárbıelep júrgenin aıtady. Óńirde teri shańǵy jasaýda odan asatyn sheber joq. 2010 jyly Shyńjań ólkelik mádenıet basqarmasy Silámbek Saǵynyshulyna «Shyńjańnyń materıaldyq emes murasy teri shańǵy jasaýdyń murageri» degen resmı ataq bergen.
«Teri shańǵy jasaýdy ákemnen úırendim. Alǵashqy teri shańǵymdy 15 jasymda jasadym. Biz úshin bul qar shańǵysy taptyrmaıtyn kólik quralymyz boldy. Altaıdyń qysy uzaq, qary qalyń bolady. Buryndary kólik qatynas qolaısyz bolǵandyqtan jergilikti turǵyndar osy teri shańǵyny keń paıdalanǵan. Ańshylar men sharýalardyń negizgi kóligi bolǵan. Shańǵynyń ózegin qaraǵaı men qaıyń aǵashynan jasap, syrtyn jylqy sıraǵynyń terisimen qaptaıdy. Ornynan qozǵalyp, ekpin alý úshin bir taıaqty ǵana qoldanǵan. Basqa qar shańǵyǵa qaraǵanda, teriden jasalǵan qar shańǵynyń ózindik ereksheligi bar: taýǵa shyqqanda teri júnine qarsy baǵytta bolǵandyqtan, úıkelis kúshin arttyryp, qar betine jabysyp, bıikten artqa syrǵyp ketýden saqtaıdy. Taýdan tómen syrǵanaǵanda jyǵylǵan teri júnine baǵyttas bolǵandyqtan, úıkelis azaıyp, jyldamdyǵy basqa qar shańǵylardan tez bolady», - deıdi teri shańǵy jasaýdyń sheberi Silambek Saǵynyshuly.
Baq.kz
