Qyzylorda oblysynyń Aral aýdanynyń turǵyny áskerge ketken balasynyń aqylyna aljasyp kelgenin aıtyp jan ushyrdy, dep hbarlaıdy “Adyrna” ulttyq portaly Stan.kz saıtyna silteme jasap.
Otan aldyndaǵy boryshyn óteýge ketken 19 jastaǵy jigit qazir jaqyndaryn múldem tanymaıdy.
Esinen adasqan sarbaz qoıylǵan suraqtarǵa jaýap bere almaıtyn halge jetken. Tipti, óz ákesine de qol kóterip júr. Ashynǵan ata-ana munyń bárine áskerı qyzmetkerler kináli, deıdi.
Áskerden oralǵanyna 3 kún bolǵan Renat Jetkergenovtiń qazirgi jaǵdaıy osy. Otbasynan tynyshtyq ketken. Kúndiz-túni aıqaılap, jaqyndarynyń mazasyn alady. Úıde turǵan zattardy jan-jaqqa laqtyryp, qıratyp jatqan kórinedi. Tynyshtaldyrýǵa tyrysqan ákesi de balasynan birneshe ret taıaq jegen.
“Serjanttarynyń bárin ákelip, meniń aldyma alyp kelińizder sizderden suraıtynym. Sap-saý balany aýrý qylyp, mynadaı qylyp ákep tastaǵany úshin. Ofıer Málikov Álimjan, Kópjan degen serjanttardy meniń aldyma ákelýlerińizdi surmaımyn”, – dep ashyndy sarbazdyń anasy Aıǵanym Izbasarova.
Ashynǵan ájesi de, nemeresin osy kúıge túsirgender jazasyn alýyn suraıdy. Sap-saý ketken balasyn emdetip berýdi talap etip otyr.
“Qandaı kúıinde alyp ketti, sondaı kúıinde ákelip bersin áskerı bólimi. Ol jerdegiler ne istep otyr? Qoı baǵyp otyr ma? Onshaqty balaǵa ıe bolmaı?” - deıdi jábirlenýshiniń ájesi Márııam Igilikova.
19 jastaǵy sarbaz Aqtaý qalasyndaǵy Teńiz jaıaý áskerleri bóliminde boryshyn ótegen. Merziminiń aıaqtalýyna 8 kún qalǵanda, "sál aýyryńqyrap" qaldy degen syltaýmen úıine qaıtarylǵan. Renatty kútip alǵan ata-anasy uldarynyń túrin kórip jaǵalaryn ustapty. Aıtýlarynsha, ústindegi kıimi shuryq-tesik, aıaǵynda jazdyq tápishke bolǵan. Otan aldyndaǵy boryshyn ótep emes, quddy quldyqta júrgendeı oraldy, deıdi aǵasy. Kúdiktengen týystary balany aýrýhaǵa baryp teksertken.
“Basynan soqqy alǵan. Qysym, davlenıe bar deıdi. Sol júrekti kóterip tur. Sosyn balada basynda aýytqý jaǵdaı bolyp tur, dedi. Ártúrli sandyraqtap, boǵaýyz sózderdi aıtyp, bizdi qushaqtap uryp, ákesin uryp, anasyn mazaq qylyp kúlip ártúri jaǵdaı bolyp jatyr”, – deıdi sarbazdyń aǵasy Bahtııar Naǵashybaev.
Aǵasyna úıge kelgende áskerı shendilerdiń qalaı qorlaǵanyn aıtqan. Qaıtatynnan 8 kún buryn 4 qyzmetker uryp-soǵyp, qulaǵyn tesip ábden qınapty.
“Kóke meni sol tórt serjantym basqa kazarmaǵa alyp ketip sol jerge baryp maǵan ızdevatelstva jasap, qulaǵyn tesken, qulaǵynda jaraqaty tur. Qulaǵyn ınemen tesip "men seni qyz qylamyn, men seni áıelim qylamyn" dep sóıtip zorlyq-zombylyq jasaǵan balaǵa”, – deıdi aǵasy.
Qorǵanys mınıstrliginiń ókili munyń barlyǵyn joqqa shyǵaryp álek. Olar Renat ásker qataryna qabyldanǵanda densaýlyǵy jaqsy bolǵanyn, áskerde de oǵan eshkim tıispegenin aıtty.
“Tájirıbeli komandırler, tárbıeshiler men serjanttar sarbazǵa áskerı qyzmetti ótkerý ýaqytynda qoldaý kórsetken. Sonymen birge, qatardaǵy jaýynger Renat Jetkergenov qyzmet ótkergen kezinde densaýlyǵyna jáne basqa da shaǵym jasamaǵan”, – deıdi QR qorǵanys mınıstrliginiń ofıeri, maıor Ǵanı Núsipov.
Áskerde birge bolǵan jaýngerlik dosy áskerı bólimde álimjettik joq dep otyr.
“Qaıtýyna 2-3 kún ýaqyt qalǵanda jetkende Renat ózin jaman jaǵynan kórsete bastady. Minez-qulqy ózgerdi, bizdi shoshytty”, – deıdi jaýynger dosy Álıhan Núsipbek.
Kazarmada ne bolǵany belgisiz. Renattyń da jaǵdaıdy túsindirýge shamasy joq. Dese de, sarbazdyń et jaqyndary aıyptylardy taýyp, ádil jaza berýdi talap etpekshi.
“Adyrna” ulttyq portaly
