Qazaq KSR būrynǧy bılım ministrı Qajahmet Balahmetov 96 jasynda dünieden öttı, dep habarlaidy Zakon.kz.
Būl turaly äleumettık jelıde QR Bılım jäne ǧylym ministrlıgınıŋ basşysy Ashat Aimaǧambetov jazdy.
"Bügın otandyq bılım beru ısınıŋ korifeiı, Qazaq KSR bılım beru ministrı bolǧan Qajahmet Balahmetov ömırden ötkendıgı turaly suyt habar jetıp, köŋıldı qūlazytty.
Qajahmet Balahmetūly elımızdıŋ bılım beru salasyn damytuǧa baǧa jetpes üles qosqan adam. Būl salany 13 jyldan astam basqarǧan ol, balalar men jastardy oqytu mäselesıne erekşe nazar audaratyn.Soŋǧy ret Qajahmet Balahmetovpen biyl jazda 95 jas mereitoiymen qūttyqtap barǧanymda kezdesıp edık. Ol ünemı bılım beru ısındegı jaŋalyqtardy qadaǧalap, öz täjıribesımen bölısıp otyratyn.
Qajahmet Balahmetūlynyŋ tuǧan-tuystary men jaqyndaryna qaiǧylaryna ortaqtasyp, köŋıl aitamyn", dep jazdy ol.
Qajahmet Balahmetov 1926 jyly, qazırgı Aiyrtau audanynda düniege kelgen. QazMU-dy (qazırgı äl-Farabi atynd. Qazaq ūlttyq un-tı) bıtırgen (1948). 1948 — 52 j. Syrymbet orta mektebınıŋ mūǧalımı, 1953 — 57 j. Bırjan sal audany Makinsk jäne Stepniak orta mektepterınıŋ direktory, 1957 — 60 j. Kökşetau oblysy Halyqqa bılım beru bölımı meŋgeruşısınıŋ orynbasary, 1968 — 80 j. meŋgeruşısı, 1970 — 74 j. Qazaqstan Kompartiiasy OK-nıŋ Ǧylym jäne Bılım beru mekemelerı bölımı meŋgeruşısınıŋ orynbasary; 1974 — 87 j. Qazaq KSR Oqu-aǧartu ministrı qyzmetterın atqarǧan. B. 13 jyl boiy qazaq-korei dostyǧy qauymdastyǧynyŋ töraǧasy boldy. Bılım beru mäselelerıne arnalǧan 70-ten asa eŋbekterı jaryq kördı. TMD-nyŋ Halyqar. balalar qory assosiasiiasynyŋ vise-prezidentı bolyp sailanǧan. 3 märte Eŋbek Qyzyl Tu ordenımen jäne medaldarmen, tös belgılermen jäne gramotalarmen marapattalǧan.
"Adyrna" ūlttyq portaly
