Atyrauda jer üidıŋ jylytu qazandyǧy jarylyp, üş student ölım auzynan qaldy. Apattan zardap şekken 19 jastaǧy ekı jıgıttıŋ hälı müşkıl. Denesınıŋ 95 paiyzyn küiık şalǧan. 22 jastaǧy boijetkennıŋ de jaǧdaiy naşar. Būl turaly “Adyrna” ūlttyq portaly KTK telearnasyna sılteme jasap habarlaidy.
Joiqyn jarylystan baspananyŋ tügı qalmai janyp ketken. Tek tört qabyrǧasy qalǧan. Üş studenttı qyzyl jalynnan körşılerı qūtqaryp qalǧan.
«Balausa» yqşamaudany tūrǧyndarynyŋ tün tynyştyǧyn gürs etken dauys būzdy. Jer üilerdıŋ bırınde jylytu qazandyǧy jarylyp, baspana örtke oranǧan. Oqiǧa ornyna jinalǧan jūrt örtenıp jatqan üidıŋ ışındegı studentterdı qūtqaryp qalǧan.
Tüngı saǧat bır şamasynda jylytu qazandyǧy gürs etıp jarylǧan. Joiqyn jarylystyŋ dybysyn estıgenderdıŋ aituynşa, üidıŋ töbesı bırden kökke ūşypty.
Zäre-qūty qalmaǧan körşı jıgıtter qaumalap jürıp jalyn qūşaǧynda qalǧan üş studenttı syrtqa şyǧaryp alǧan. Keiın taǧy da kışıgırım jarylys bolǧan. Jarty saǧat ötıp ört küşeigen kezde tötenşelıkter kelıp, qyzyl jalyndy söndırgen. Üidıŋ 120 şarşy metrı tügı qalmai janyp ketken. Tün ortasynda örttı söndıruge 16 qyzmetker men 3 tehnika jūmyldyrylypty. Üş student körşı-qolaŋnyŋ arqasynda tırı qalǧan.
Atyrau qalasynyŋ tūrǧyny Esenqos Qoişybaev:
«Tösenıştı körşıler berdık. Körpelerdı sulap äkeldık. Soǧan salyp jatqyzdyq. Jarty saǧat, 45 minut degende bırınşı jedel järdem keldı. Sodan keiın ekınşısı keldı. Üşınşı taǧy keldı. Olar da küigen adamdardy bır-bırlep alyp kettı. Jarty saǧattan keiın ört söndıru qyzmetı kele bastady», – deidı.
Külge ainalǧan şaŋyraqtyŋ iesı Almatyda tūrady. Bos tūrǧan üidı uaqytşa tuystaryna tabystap ketken.
Atyrau qalasynyŋ tūrǧyny Ömırlan Tastanov:
«Jezdemnıŋ üiı. Būl jaǧdaidy taŋerteŋ estıdık. Olar Almatyǧa köşıp ketken. Būl üi iesız qalmasyn dep jatqyzyp tūr ǧoi», – deidı.
Därıgerlerdıŋ aituynşa, jylu qazandyǧy jarylǧan kezde zardap şekken 2002 jylǧy ekı bozbalanyŋ jaǧdaiy öte auyr. Al 22 jastaǧy qyz balanyŋ densaulyǧy bırşama täuır.
Atyrau oblyy auruhanasynyŋ bölım meŋgeruşısı Beken Qūlniiazov:
«1999 jylǧy qyz bala jaraqat bölımınde jatyr. Denesınıŋ 35 paiyzyn küiık şalǧan. Bırınşı, ekınşı därejede. Ol kısınıŋ jaǧdaiy qalypty auyr jaǧdaida», – dedı.
Jarylystyŋ sebebı anyqtalyp jatyr.
“Adyrna” ūlttyq portaly
