Qansonarda búrkitshi shyǵady ańǵa,
Tastan túlki tabylar ańdyǵanǵa.
Jaqsy at pen tatý joldas — bir ǵanıbet,
Yńǵaıly yqsham kıim ańshy adamǵa.
Abaı
Osy jeksenbide Aıraqty taýynyń eteginde «Ata kásip – ańshylyq» atty qusbegilik pen saıatshylyqty nasıhattaýǵa arnalǵan shara ótti. «Otpan» memlekettik kásiporny ujymynyń uıymdastyrýymen ótken sonarǵa Otpan taýdyń etegindegi Tuybek aýylynyń qusbegileri Mereke Óteǵalıev, Ótejan Sovetov, Ertis Esjanov, Aıshýaq Taımanov pen birqatar tazy ıeleri qatysty.
— Mańǵystaýda bes-alty búrkitshi bar. Óńirde ulttyq sportty nasıhattaý, týrızmdi damytý maqsatynda saıatshylyqqa kóńil bólinýde, — deıdi ulttyq dástúrdi jandandyryp júrgen búrkitshi Mereke Óteǵalıev.
M. Óteǵalıevtiń qusbegilikpen aınalysyp júrgenine 5-6 jyldyń júzi bolǵan. Ol 2016 jyly Jambyl oblysynda ótken «Qaýyrsyn» klýbynyń 35 jyldyǵyna arnalǵan respýblıkalyq jarysta Qurmet gramotasymen marapattalǵan. Búrkitti ańǵa salýdan mol tájirıbesi bar ol balapandy baptaýdyń qupııasymen bólisti:
— Uıadan shyqqan balapandy kelesi jyly jarystarǵa qatystyra berýge bolady. Bul kezde ol túlki, qoıan ala bastaıdy. Ańǵa salý úshin úshin qusty jaz boıy maıly, qunarly tamaq berip, semirtip, qaýyrsynyn túletemiz de, qansonardyń aldynda 30-40 kún buryn aryqtatamyz. Óıtkeni «toq búrkit túlki almaıdy». Biraq birden arytýǵa bolmaıdy. Baby kelispegen búrkit ańǵa túspeıdi. Ol úshin qyzyl etti jyly sýǵa salyp, qanynan aıyryp, tolyq aǵartyp beremiz. Muny aqjem dep ataıdy. Erteń ańǵa shyǵady degen kúni búrkittiń ishin tazalaý úshin qoıa, ıaǵnı kıiz jutqyzamyz. Kıiz qoıa maıdy sińirip, búrkitti ish maıynan aryltady, — deıdi ol.
Uıymdastyrýshylar sharany ótkizýdegi maqsat tarıhy tereńde jatqan bekzat ónerdi nasıhattaý, telefonǵa telmirgen jastardy qazaqy ónerge qyzyqtyrý arqyly «Rýhanı jańǵyrý» baǵdarlamasyn iske asyrý ekenin aıtady.
— Qusbegilikti týrızmniń kózi retinde damytpaqpyz. Bolashaqta burynǵy salt boıynsha salbýryn, ıaǵnı ańshylar men ónerpazdardyń birigip ańǵa shyǵý dástúrin jandandyrý da josparlanyp otyr. Túlki alpys eki aılaly desek te, búgin búrkitshilerdiń qanjyǵasy maılandy, — dedi «Otpan» MKQK ókili Quralaı Izimbergenova.
Bul kúni ańshylar oljaly qaıtty. Buǵan deıin tórt ret uıymdastyrylǵan sharaǵa bastamashy bolyp júrgenderdiń biri «Otpan» tarıhı-mádenı kesheniniń qyzmetkeri Jomart Aıdarbektiń aıtýynsha, shara áýelde qusbegilerdiń kezdesýinen bastalǵan.
— Bul shara sońǵy 4-5 jylda dástúrli túrde uıymdastyrylyp keledi. Áýelde qusbegilerdiń kezdesýinen bastalǵan edi. Búginde Tuybek aýylynda 4-5 búrkitshi bar. Osy taýdyń mańaıyndaǵy aýyl mektepteriniń oqýshylary qusbegilikpen tanysyp otyr. Búgin Otpan taýynyń eteginen Aıraqty taýyna deıin bardyq. Sonarǵa Mańǵystaý, Túpqaraǵan aýdandarynyń aýyldarynan, Quryq pen Saıyn aýyldarynan tazylaryn ertip jigitter keldi. Qanjyǵamyz maılandy. Maqsatymyz – ata-babadan kele jatqan bekzat óner saıatshylyqty nasıhattaý edi. Búgin sol sol maqsatqa jetkendeımiz, — dedi ol.
“Rýhanı jańǵyrý” baǵdarlamasy aıasynda
Mańǵystaý oblystyq mádenıet, muraǵat
jáne qujattama basqarmasy men “Adyrna”
ulttyq portalynyń birlesken jobasy
