Moŋǧoliianyŋ Baian-Ölgii aimaǧynda bürkıt salyp, saiat qūratyn jasöspırım qazaq qyzdar köbeie bastady. Solardyŋ bırı Äigerım Äskerdı äke-şeşesı «eŋ jas bürkıtşı» dep ataidy.
Moŋǧoliianyŋ Baian-Ölgii ölkesındegı Altai aimaǧynda tūratyn 12 jastaǧy Äigerım Äsker bürkıtpen aŋ aulau ısıne büldırşın kezınen bastap qyzyǧa bastaǧan. Kışkentaiynan atqa mınıp, äkesımen erıp, sonarǧa şyqqan. Onyŋ yntasyn körgen ata-anasy Äigerımge arnap ūiadan bürkıt balapanyn äperıp, arnaiy üiretken. Qazır qūsynyŋ jasy törtte. Aty – Aqbalaq. Äkesı Äsker Ūlyqpanūlynyŋ aituynşa, qyrda tūratyn qystaqtaǧy Aqbalaqty oquyna bailanysty Äigerım kün saiyn köre almaidy. Esesıne demalys künderı kelgen kezde baǧyp-qaǧady.
- Özı bürkıttı jaqsy köredı. Sabaqqa da alyp ketem deidı. Oǧan qaidan (küledı). Telefonmen söilesken saiyn bürkıtın sūraidy, - deidı äkesı.
Al Äigerımnıŋ özı bürkıtşılıktıŋ oquyna eş kedergı joǧyn, qaita oqudan serguge kömektesetının aitady.
Bızdıŋ mektepte menen basqa taǧy bır bürkıtşı qyz bar. Bıraq ol 12-synypta oqidy. Mūǧalımderdıŋ, dostarymnyŋ közqarasy jaqsy. Qoldap kömektesedı, - deidı Äigerım.
Äigerımnıŋ anasy Aqgül qyzynyŋ qyzyǧy men qiyndyǧy bırdei bürkıtşılık önerıne qyzyǧuyn qoldaidy. Äitkenmen äuelgı kezde qoryqqanyn da jasyrmaidy.
Äigerım Äsker, Moŋǧoliiada tūratyn bürkıtşı qyz.
- Bürkıtşı bolu üşın batyldyq kerek. Şydamdylyq kerek. Suyqta taiǧaq kezde tau-tasta jüredı. Basynda qoryqqanbyz. Balanyŋ özı qalap tūrǧannan keiın şydaidy dep oiladyq. Oilaǧanymyzdai boldy, - deidı anasy.
Önerın şyŋdau üşın Äigerımdı äke-şeşesı türlı jarystarǧa jıberıp tūrady. Mäselen, byltyr nauryzda ötken bürkıtşıler jarysynda Äigerım audan boiynşa 1-oryn alsa, qyrküiek aiynda ötken qūsbegıler jarysynda 4-oryn alǧan.
- Otyzǧa tarta bürkıtşı qatysty. Bırneşe qyz bala boldy. Köbı 18-19 jastaǧylar. Eŋ kışkenesı Äigerım boldy, - deidı äkesı Äsker Ūlyqpanūly.
Ata-anasy 7-synypta oqityn Äigerımdı «Baian-Ölgiidegı eŋ jas bürkıtşı qyz» dep sipattaidy. Olardyŋ sözınşe, qyzdarynyŋ önerıne qyzyqqan Singapurdyŋ kino kompaniiasy Äigerım turaly derektı film tüsırmekşı. Äsker Ūlyqpanūly äzırge kinokompaniiamen arada eşqandai kelısım jasalmaǧanyn, bıraq tüsıruşı toptyŋ mausym aiynda kelıp tüsıru jūmystaryn bastaitynyn habarlaǧanyn aitty.
- Qyrküiek aiynda Singapurdan 14 kısı kelıp ketken bolatyn. Üş kündei bızdıŋ aimaqta bolyp kettı. Sapar soŋynan kino tüsıretınderın aitty. Qazır kün suyq bolǧandyqtan ba, kele almai jatqanǧa ūqsaidy. Altynşy aiǧa qarai kelemız dedı. Derektı filmnıŋ basty keiıpkerı Äigerım bolady, - dedı Äsker Ūlyqpanūly.
Qazır Äigerım Aqbalaqty mausym aiynda tüsırıletın filmge daiyndap, baptauǧa kırısken. Demalysqa kelgen saiyn tauǧa şyǧyp, bürkıtın ūşyryp jattyǧyp jür.
Moŋǧoliialyq bürkıtşı qyz Aişolpan Nūrǧaiyp (ortada) qyran qūsymen.
Būǧan deiın Azattyq Baian-Ölgiidegı tanymal bürkıtşı qyz Aişolpan Nūrǧaiyp turaly bırınşı bolyp jazǧan edı.
Amerikalyq rejisser Otto Bell ol turaly «Bürkıtşı qyz» (The Eagle Huntress) atty derektı film tüsırıp, 2016 jyldyŋ qazan aiynda köpşılıktıŋ nazaryna ūsynǧan. Qazır Ölgii qalasynda 11-synypta oqityn Aişolpandy älemge tanytqan filmnen keiın Batys aqparat qūraldary bürkıtşı qyz turaly köp jazdy. Qazaq diasporasy tūratyn aimaqty dür sılkıntken Aişolpan faktory basqa jasöspırım qyzdardy da dästürlı aŋşylyq önerıne qūmar qyla bastaǧany baiqalady.
