Aqtóbede iz-túzsiz ketken geologtar tabyldy dep habarlaıdy "Adyrna" ulttyq portaly.
Aqtóbe oblystyq TJD baspasóz qyzmeti habarlaǵandaı, qazir olardyń jaǵdaıy jaqsy. Iz-túzsiz ketken geologtar keshe saǵat 14.50-de baılanysqa shyqqan. Olar qystaqtan tabyldy.
"Joǵalǵan geologtar Qısyqsaı qystaǵynan aman-esen tabyldy. Jaǵdaılary jaqsy, medıınalyq kómek qajet bolmady. Qazirgi ýaqytta tabylǵan 4 geolog Áıteke bı aýdanynyń Qarabutaq aýylyna jetkizildi",-dep habarlady oblystyq TJD baspasóz qyzmeti.
Aıta keteıik, 26 qarashadan bastap geologtarǵa izdeý jarııalandy. Olar 25 qarasha kúni sońǵy ret baılanysqa shyǵyp, keıin habar-osharsyz qalǵan. Quramynda 33 adam jáne 8 birlik tehnıkadan turatyn 5 izdeý toby jumyldyryldy. Sondaı-aq avıa izdeý úshin TJM "Qazavıaqutqarý" AQ-nyń evrokopteri ushyp, Aqtóbe-Qumsaı-Qaıraqty-Qaıyńdy-Mılysaı-Araltoǵaı mańyn sholyp ótken bolatyn.
"Adyrna" ulttyq portaly.
