“Uralsk emes,Oral!”: Aimaǧambetov qazaq tılınıŋ qoldanys aiasyna ūlǧaitu qajettıgın aitty

Parlament senaty körnekı aqparat jäne dıni qyzmet mäselelerı turaly zaŋ jobasyn ekı oqylymda qarady. 

Bılım jäne ǧylym ministrı Ashat Aiǧamabetovtıŋ aituynşa, zaŋ jobasynyŋ negızgı maqsaty – derektemeler men körnekı aqparat mätınderın orfografiia normalaryna sai jäne mätınderdıŋ tüpnūsqasyna säikestıgın saqtau arqyly qatesız jazu, dep habarlaidy “Adyrna” ūlttyq portaly Sputnik.kz saityna sılteme jasap.

Jobada eldegı äkımşılık-aumaqtyq bırlıkterdıŋ, fizika-geografiialyq obektılerdıŋ atauyn jazuǧa qatysty normalar qarastyryldy. Alaida orys nemese basqa tılderde atalatyn eldı mekenderdıŋ ataulary özgermeidı, sol küiınde jazylady.

“Mysaly, Michurino auyly sol küiı qalady, qazırgıdei Michurin auyly dep özgertılmeidı. Andreevka auyly Andreev dep jazylmaidy. Monastyrskaia köşesı Monastyr köşesı dep audarylyp jür, endı ol Monastyrskaia dep özgerıssız qalady. Mäselen, Aqquly degen auyl bolsa, ony Lebiaje dep audarmai, sol küiı Aqquly dep jazamyz. Oral qalasy “Uralsk” emes, Oral qalasy retınde tüpnūsqamen jazylady”, – dedı Aimaǧambetov.

Sondai-aq, onyŋ aituynşa, jol belgılerı de, Qazaqstan ratifikasiialaǧan halyqaralyq şarttarda özgeşe közdelmegen jaǧdaida memlekettık tılde ǧana jazylady.

“Mysaly, Qyzylordadaǧy kışıgırım auylda ainalma jol degen belgı tūrsa, qoldanystaǧy zaŋ boiynşa ony mındettı türde “ainalma jol”, “obezd” dep jazu kerek. Endı halyqaralyq jol bolmasa, turister kelmese, tek qana qazaqtar tūratyn şaǧyn auylda tek bır tılde jazuǧa mümkındık berılıp otyr. Al eger halyqaralyq jol bolsa, onda basqa tılderde jazu mümkındıgı qalady”, – dep tüsındırdı vedomstvo basşysy.

Būdan bölek, memlekettık emes ūiymdardyŋ blankılerı men maŋdaişalary memlekettık tılde jazylady. Qajet bolǧan kezde basqa tılderde jazuǧa mümkındık berıledı. Mūndai norma habarlandyru, jarnama, preskuranttar, baǧa körsetkışterı, as mäzırlerı, basqa da körnekı aqparattarǧa qatysty. Parlament senaty zaŋ jobasyna körnekı aqparatqa qatysty engızılgen tüzetulerdı maqūldady. Alaida qūjattyŋ dıni qyzmetke arnalǧan bölıgıne bırqatar özgerıs engızıp, zaŋ jobasyn mäjılıske kerı qaitardy.

“Adyrna” ūlttyq portaly