Qazaqtyŋ körnektı tarihşysy, zūlmat jyldardyŋ aqtaŋdaq betterın aşyp, bügıngı ūrpaqqa qaz qalpynda jetkızgen ǧalym Talas Omarbekov dünieden öttı. Būl turaly Halyqaralyq Türkı akademiiasynyŋ prezidentı Darhan Qydyrälı Facebook-tegı paraqşasynda jazdy, dep habarlaidy QazAqparat.
«Qairan Talas aǧamyz Haqqa qauyşypty. Tarihşylardyŋ tıregı edı, aqtaŋdaqtarǧa alǧaş barǧandardyŋ bırı edı, ırı edı… İmany joldas bolsyn!», - delıngen jazbada.
Talas Omarbekov 1948 jyly 29 mamyrda Jambyl oblysynyŋ Baizaq audanyndaǧy Aqjar auylynda dünie esıgın aşqan.
Joǧary bılımdı Abai atyndaǧy QazPİ-dıŋ tarih fakultetınde alady. 1971 jyly oquyn tämamdap, qyzmet jolyn Jambyl oblysynyŋ Jualy jäne Baizaq audandarynda tarih pänınıŋ oqytuşysy, oqu ısınıŋ meŋgeruşısı retınde bastady.
Ǧalym qazaqtyŋ közı qaraqty qauymyna Mūhamed Haidar Dulati mūralaryn, orta ǧasyrlardaǧy tarihi tūlǧalardy ūlttyq közqarasta zerdelep, qazaq tarihyn kezeŋdeudıŋ teoriialyq-metodologiialyq mäselelerı boiynşa ırgelı paiymdar jasaǧan zertteuşı retınde belgılı.
Sondai-aq ol Qazaqstanda stalindık totalitarlyq jüienıŋ ornyǧu saldaryn barynşa batyl zerttegen alǧaşqy qazaq tarihşylarynyŋ bırı boldy.
Ötken ǧasyrdyŋ 20-30-jyldaryndaǧy bailardy tärkıleu, küştep ūjymdastyru saiasatynyŋ zardaptaryn aşyq körsetıp, sol tarihi kezeŋde oryn alǧan halyq narazylyqtaryna jaŋa tarihi közqaras qalyptastyrdy.
Ǧalymnyŋ artynda «Qazaq şarualaryn menşıgınen aiyru jäne küşpen ūjymdastyru», «20-30 jyldardaǧy Qazaqstan qasıretı» (1997), «HH ǧasyrdaǧy Qazaqstan tarihynyŋ özektı mäselerı» (2001), «Qazaqstan tarihyna jäne tarihnamasyna ūlttyq közqaras» (2004) siiaqty ırgelı eŋbekter qaldy. 1997 jyly QR-nyŋ äleumettık ǧylymdar
Akademiiasynyŋ akademigı atanǧan.
Tarihşy köz jūmar sätıne deiın «Saiasi quǧyn-sürgın qūrbandaryn tolyq aqtau» jönındegı ūlttyq komissiianyŋ qūramynda belsendı jūmys ıstep, ūlt-azattyq sipattaǧy köterılıster men qozǧalystardyŋ naqty sanyn tūraqtandyruǧa atsalysty.
“Adyrna” ūlttyq portaly
