Milliardtaǧan teŋgenıŋ kontrabandalyq önımın tasyǧan eks-prezident Nūrsūltan Nazarbaevtyŋ qaryndasy Änipa Nazarbaevanyŋ qatysy bar kompaniiaǧa qatysty sot ükımı şyqty. Būl turaly Qarjy monitoring agenttıgı aqparat taratqan, dep habarlaidy “Adyrna”
Aqparatqa säikes, tergeu barysynda uäkılettı ekonomikalyq operator märtebesıne ie «Group of the Companies TDA» jauapkerşılıgı şekteulı serıktestıgı Qytaidan Qazaqstanǧa tūtynu tauarlary tielgen 100-den astam konteinerdı kontrabandalyq jolmen zaŋsyz äkelgenı anyqtalǧan.
Būdan bölek, kompaniia qaramaǧyndaǧy 10 jauapkerşılıgı şekteulı serıktestık arqyly jalǧan şot-fakturalar jasaǧan. Osylaişa memleketke 10 milliard teŋge zalal keltırgen.
Tergep-tekseru kezınde memleket biudjetıne 643 million teŋge qaitarylǧan. Sot şeşımımen 1,3 milliard teŋge bolatyn tauar, küdıktılerge tiesılı 300 million teŋge somasyndaǧy mülıkke şekteu qoiylǧan.
Būǧan qosa, atalǧan kompaniiamen bailanysta bolǧan 47 serıktes käsıporyn öz erkımen özara esep aiyrysudy toqtatyp, biudjetke 240 mln teŋge salyq tölegen.
Almaty qalasynyŋ Almaly audandyq sotynyŋ ükımımen kınälı tūlǧalar mülkın tärkılei otyryp, 1 jyl 4 aidan 4 jyl 6 aiǧa deiın bas bostandyǧynan aiyrylǧan. Sonymen qatar, ıske qatysy bar bır adamǧa halyqaralyq ızdeu jariialandy.
Aita ketsek, 2022 jyly mausymda Qazaqstannyŋ bas prokuraturasy «Group of the Companies TDA» kompaniiasynyŋ tauarlardy räsımdeu kezınde zaŋbqzuşylyqtar jasaǧany anyqtalǧanyn habarlaǧan. Aşyq derekközderde būl kompaniianyŋ qūryltaişylarynyŋ bırı eks-prezident Nūrsūltan Nazarbaevtyŋ qaryndasy Änipa Nazarbaeva ekenı aitylǧan. Elektrondy ükımet bazasyndaǧy qūjatta Group Of The Companies Tda serıktestıgınıŋ taǧy bır qūryltaişysy Äli Janbolatūly Qylyşpaev ärı osy kompaniianyŋ direktory dep jazylǧan-dy.
