Üşınşı megapoliste sifrlandyru baǧytynda auqymdy jūmys atqaryluda. Būl turaly Şymkent qalalyq sifrlandyru basqarmasynyŋ mamandary BAQ ökılderıne ötkızgen baspasöz tury barysynda mälımdedı. Aqparattyq top aldymen «I-kömek 109» ortalyǧynda boldy.
Ortalyq jetekşısı Azat Ämırtaidyŋ baiandauynşa, «I-kömek 109» qyzmetı qala äkımı Mūrat Äitenovtyŋ bastamasymen 2020 jyldyŋ 26 mausymynda aşylǧan. Bır jyldan astam uaqyt ışınde qala tūrǧyndarynan 230 myŋnan asa aryz-şaǧym tüsken. Sonyŋ ışınde 228 myŋ aryz oŋ şeşılıp, körsetkış 98 paiyzdy qūrap otyr. Ortalyq ökılderınıŋ aituynşa, qala tūrǧyndaryn mazalaityn sūraqtardyŋ ışınde qoǧamdyq kölık, jaryq pen su, qoqys tazalau sekıldı kommunaldy mäseleler bar.
Būdan keiın «I-Shymkent» jobasynyŋ jūmysy tanystyryldy. Şymkent qalalyq sifrlandyru basqarmasy basşysynyŋ mındetın atqaruşy Maqsat Tuǧanbaidyŋ aituynşa, būl ortalyq ekı formatta jūmys ısteidı.
– Özderıŋızge mälım, qazırgı taŋda bükıl qyzmetter elektrondy formatqa köşude. Osyǧan bailanysty qala äkımınıŋ tapsyrmasyna säikes «I-Shymkent» jobasy jüzege asyrylyp otyr. Mūnda bır tereze arqyly bırneşe qyzmettı atqaruǧa mümkındık bar. «I-Shymkent» ortalyǧy kelesı jyldan bastap ekı formatta jūmys ısteidı. Bırınşı format – onlain, iaǧni, portal arqyly. Azamattar I-shymkent.kz saity arqyly kommunaldy qyzmetterge jäne internetke ötınış qaldyra alady. Ekınşı format – offlain. Erımbetov köşesı, 52/3 ǧimaratta aşylǧan front-ofiske kelıp, ötınıştı qaldyruǧa bolady, – deidı Maqsat Tuǧanbai.
Būdan keiın BAQ ökılderıne qalalyq ışkı ıster departamentınıŋ şūǧyl basqaru ortalyǧy men Säule şaǧynaudany tūrǧyndaryn internetpen qamtamasyz etu boiynşa atqarylyp jatqan jūmystar tanystyryldy. Būl jūmystar sifrlandyru basqarmasynyŋ tıkelei baqylauymen jüzege asyryluda.
Nūrlan BEKTAEV FOTO: Serık QOSAEV
