Olardyń aıtýynsha, alǵan dıplomdarynda sáıkestendirý nómiri joq.
"Bes aıdan beri jumysqa tura almaı júrmiz. Tórt jyl 210 myń teńgeden tólep oqyǵan dıplomymyz jaramsyz bolyp shyqty, endi qaıda baramyz, ne isteımiz?", - dep jazdy bir top jas Instagram jelisindegi kritikakyzylordy-paraqshasynda.
Túlekter lıenzııa máselesi qashan sheshiletinin bilý úshin telefon soǵyp, ýnıversıtetke birneshe márte barǵanyn, ázirge jaýap joq ekenin aıtady.
"Qansha túlekke biregeı sáıkestendirý nómiri joq dıplom berildi. Al birinshi kýrs stýdentteri she? Instıtýt ókilderi sotta jeńip shyqqandaryn aıtqan", - deıdi qyzylordalyqtar.
QR Bilim jáne ǵylym mınıstrliginiń baspasóz hatshysy Móldir Ábdýalıeva ýnıversıtet áreketi zańsyz ekenin aıtady.
"2021 jyldyń jazynda biz "Aqmeshit" gýmanıtarlyq-tehnıkalyq ınstıtýty bas lıenzııasynan aıyrylǵany týraly aqparat jarııaladyq. Tıisti sheshimdi sot qabyldady. Ýnıversıtetke barlyq sáıkessizdikti joıý úshin ýaqyt berildi. Alaıda joǵary oqý orny ony bilim berý qyzmetteriniń sapasyn jaqsartý úshin qajetti jumys júrgizýdiń ornyna sot talqylaýyna jáne QR BǴM komıtetiniń is-áreketterine shaǵymdanýǵa jumsady", - dedi QR Bilim jáne ǵylym mınıstrliginiń baspasóz hatshysy Móldir Ábdýalıeva.
Sondaı-aq, vedomstvo ókilderi lıenzııadan aıyrý týraly jáne JOO-da akkredıtteý bolmaǵan jaǵdaıda olar granttardy saqtaı otyryp jáne ıgerilgen kredıtter men pánderdi qaıta esepke ala otyryp, basqa JOO-ǵa aýysýǵa quqyly ekeni týraly jurtshylyqty habardar etkenin málimdedi.
"Ata-ana men stýdentterdiń jarııalanǵan aqparatqa nazar aýdarýy jáne joǵary oqý oryndaryn tańdaý men odan ary oqý máselesine jaýapkershilikpen qaraýy óte mańyzdy. Joǵary oqý oryndaryn jabý kezinde mınıstrlik bilim berý qyzmetteri sapasyna qoıylatyn talaptardy basshylyqqa alady", - dedi vedomstvonyń baspasóz hatshysy M. Ábdýalıeva.
Al rektor Erlan Shynbergenov ınstıtýttan lıenzııa alyp, dıplomdardyń jaramsyz ekeni týraly áńgimelerge senýdiń qajeti joq dep jaýap berdi.
"Bizde kóp bilikti muǵalimder men professorlar jumys isteıdi. Eger bizde lıenzııa bolmasa, olar qalaı jumys istep júr? Resmı túrde, zań boıynsha jumys isteımiz! Dıplomdarǵa keletin bolsaq, onda tek serııalyq nómirdi qoıý kerek. Biz dıplomdardy 2021 jyldyń mamyrynda berdik, al dıplomdardyń jeke úlgilerinde biregeı sáıkestendirý nómirleri bolýy kerek degen buıryq 2021 jyldyń 7 maýsymynda shyqty. Biz QR Bas prokýratýrasyna QR BǴM Bilim jáne ǵylym salasyndaǵy baqylaýdy qamtamasyz etý komıtetiniń áreketine shaǵymdaný boıynsha ótinish berdik. Sheshim shyqqannan keıin barlyq 399 túlekke birden serııalyq nómirler qoıamyz jáne másele sheshiledi", - dedi ol.
"Adyrna" ulttyq portaly.
