Şymkent qalalyq perinataldyq ortalyqtyŋ därıgerlerı jüktılıktıŋ 39 aptasynda jatyry jyrtylyp, auyr halde perzenthanaǧa tüsken ana men balasyn aman alyp qaldy.
Aijan Abdullaeva auyr halde jedel järdem qyzmetımen qalalyq perinataldyq ortalyqqa jetkızılgen. Köp qan joǧaltqan jüktı äieldıŋ jatyryndaǧy tyrtyǧy jyrtylyp, ıştegı balasynyŋ jürek soǧysy toqtap tüsken. Ana men balanyŋ ömırın alyp qalu üşın ortalyqtyŋ därıgerlerı şūǧyl türde ota jasap, kesır tılıgı arqyly bosandyryp aldy.
Jaŋa tuǧan şaqalaqtyŋ kındık pulsasiiasy joq, jürek soǧuy baiaulap, tynys almaǧan. Balalar därıgerlerı säbige şūǧyl türde reanimasiialyq kömek körsetıp, ajaldan araşalady. Jetı kündei jasandy tynys alu apparatynda jatqan säbidıŋ qazırgı jaǧdaiy jaqsy.
Al auyr halde perzenthanaǧa tüsken anasy 3 kün jansaqtau bölımınde jatty. Bılıktı därıgerler äieldıŋ jatyryn qaita qalpyna keltırıp, ömırıne töngen qauıptıŋ aldyn aldy.
«Äieldıŋ jatyry jyrtylyp ketkendıkten qandy köp joǧaltqan. Balasy men anasyn aman alyp qalu qiyn boldy. Bıraq būl künder artta qaldy. Qazır ekeuınıŋ de jaǧdaiy jaqsy. Al äieldıŋ jatyryn saqtap qaldyq. Mūndai jaǧdaida tuylatyn şaqalaqtar köp jaǧdaida şetınep ketedı. Balanyŋ körer jaryǧy bar eken. Būǧan qosa perinataldyq ortalyqtaǧy mamandar joǧary deŋgeide kömek körsetıp, bır emes, ekı jannyŋ ömırın saqtap qaldy», - degen perinataldyq ortalyq bas därıgerınıŋ orynbasary Däulet Satov juyq arada perzenthanadan şyǧatynyn jetkızdı.
"Adyrna" ūlttyq portaly.
