Säken Maiǧaziev: Ol baǧdarlamaǧa ölıp ketsem de barmaimyn

Änşı Säken Maiǧaziev bügıngı qazaq televiziiasyndaǧy arzan şou-baǧdarlamalar men solardyŋ basy qasynda jürgen ärıptesterın synǧa aldy. Būl turaly änşı Ashat Sadyrbaidyŋ «Ülkenderdıŋ äŋgımesı» atty internet-jobasyna bergen sūhbatynda aitty. «Türkiiada jaǧymsyz baǧdarlamany japqyzyp tastaǧan. Sodan keiın olar «kım bar?» dep tımıskılep Qazaqstanǧa keldı. İä, ülken tanymaldylyqqa ie baǧdarlama. Sol qosylyp jatqan ekı jastyŋ ūrpaqtary üşın men janym aşyp, şyryldap jatsam, menıŋ ärıptesterım sol baǧdarlamanyŋ şaşbauyn köterıp, soiylyn soǧyp jür. Sonda men kım üşın zar qaqsap jürmın? Men ondai belden tömen baǧdarlamalarǧa ölıp ketsem de barmaimyn. Sol oraida: “Qazaq dep jürgen azamat qoi, Säkennıŋ bır auyz sözı üşın osy baǧdarlamaǧa barmai-aq qoiaiyq, bızdıŋ tanymaldylyǧymyz osydan kemıp qalmaidy” demeidı. Kerısınşe saǧan qas qylǧandai qylady. Osy dūrys pa endı?» – dep aşyndy änşı. Sondai-aq, Maiǧaziev atalǧan baǧdarlamaǧa qatysyp, auzyna kelgendı aityp jürgen qaragözder turaly da söz ettı. «Özderınıŋ ūrpaqtaryna özderı balta şauyp jatqan siiaqty. Men solai ǧana topşylaimyn. Olar qazırgı tanymaldylyqtaryna mas bop jürgen şyǧar. Erteŋ olardyŋ balalary bolmai ma, qyzdary düniege kelmei ma? Körıngen taudyŋ alystyǧy joq. Közdı aşyp-jūmǧanşa balalary ösedı. «Menıŋ äke-şeşem osyndai bolypty, auzynan aq it kırıp, kök it şyǧypty ǧoi» degende: «Qyzym, ol kezde tanymal bolu üşın söitkenbız», – dep otyra ma sonda? Tanymal boldyŋ al! Köpşılıktıŋ batasyn alyp jatsyŋ ba, kögerıp jatsyŋ ba, ösıp jatsyŋ ba? Bolaşaqpen jūmysy joq, bügın tanymal bolsam boldy. Bügın qarnymdy toidyryp, bır jerden tamaq ışsem boldy degen siiaqty it tırlık. Sondai baǧdarlamalar köbeiıp kettı. Dos bolyp ta, jūmsaq ta, qatty da aityp jatyrmyz. Sanasyzǧa san aitsaŋ da, darymaidy degen osy bop tūr», – deidı Maiǧaziev. Änşınıŋ būl aitqandarynan äŋgımenıŋ törkını atyşuly «Qalaulym» baǧdarlamasy jaiynda ekenın aŋǧaru qiyn emes. Būdan özge Säken Maiǧaziev pen Ashat Sadyrbai öner adamdarynyŋ arasyndaǧy auyz bırşılıktıŋ joqtyǧy, änşılerge aitylatyn halyqtyŋ syni-pıkırlerı, jemqorlyq jäne bügıngı qoǧamdaǧy qazaqtyŋ beinesı men iman jaily söz örbıttı.

---

«Qamşy» sılteidı