Qazaqstannyŋ Tūŋǧyş Prezidentı – Elbasy Nūrsūltan Nazarbaev Täuelsızdıktıŋ 30 jyldyǧyna arnalǧan saltanatty jiynǧa qatysyp, qazaqstandyqtardy ūlyq merekemen qūttyqtady.
Nūrsūltan Äbışūly öz sözınde Qazaqstannyŋ osy jyldar ışınde qol jetkızgen basty jetıstıkterın atap ötıp, täuelsız memleket qūru jäne ony damytu ısıne qoldau körsetkenı üşın Qazaqstan halqyna rizaşylyq bıldırdı.
Elbasynyŋ qūttyqtau sözınıŋ tolyq mätının nazarlaryŋyzǧa ūsynamyz.
Qymbatty otandastar!
Ardaqty aǧaiyn!
Qadırlı halqym!
Eŋ asyl qūndylyǧymyz – qasterlı Täuelsızdıktıŋ 30 jyldyq torqaly toiymen barşaŋyzdy şyn jürekten qūttyqtaimyn!
Qūrmettı Qasym-Jomart Kemelūly, Sızge mazmūndy baiandamaŋyz ben menıŋ el basqarǧan kezdegı eŋbegıme bergen asa joǧary baǧaŋyz üşın zor rizaşylyq bıldıremın.
* * *
Tūŋǧyş Prezident retınde kün-tün demei eldıŋ taǧdyr-talaiyn oilap, tuǧan halqymmen bırge tynymsyz ter tökken, tolassyz uaiym keşken kezderdıŋ är sätı menıŋ jadymda öşpestei jazuly.
«Aq tüienıŋ qarny jarylǧan» aqjoltai kün, azattyq alǧan şaǧymyz däl keşegıdei köz aldymda.
Egemen elımızdıŋ derbes däuırı, saltanatty sapary sol tarihi oqiǧadan bastalǧan edı.
Babalarymyz ǧasyrlar boiy aŋsaǧan arman aqiqatqa ainaldy.
Täŋırge täube, közdegenımız ben köksegenımızge jettık!
Kökten tılegenımız ben köpten kütkenımız boldy.
Ketken esemızdıŋ, şekken zardabymyz ben kemşın-kemısımızdıŋ orny toldy.
Äruaq qoldady, ädılet ornady:
«Myŋ ölıp, myŋ tırılgen» qasiettı halqymyz qaita tüledı.
Myŋjyldyqtar toǧysar tūsta baiyrǧy memlekettıgımız qaita jaŋǧyrdy.
* * *
Otyz jylda elımız tūtas ǧasyrǧa tatityn ūly joldan öttı.
Osy tarihi kezeŋde bız baǧyndyrǧan belester – Täuelsızdık däuırınıŋ bır-bır bederlı biıgı deuge laiyq.
Barlyǧyn tüiındei kelgende, eŋ basty jetıstıgımız – bız Qazaqstandy älem moiyndaǧan memleket retınde qalyptastyryp, eŋselı elge ainaldyrdyq.
Bügınde jahan jūrtşylyǧy Qazaq jerın – beibıt meken, Qazaq elın – märtebelı memleket, senımdı serıktes retınde tanidy.
Mūndai bedelge tek ruhy küştı, jūdyryqtai jūmylǧan bırlıgı bekem halyq qana ie bola alady.
Bır üidıŋ balasyndai, bır qoldyŋ salasyndai yntymaǧy jarasqan jūrtymyzdyŋ ülken-kışısıne sol üşın şynaiy alǧysymdy arnaǧym keledı.
Osy oraily sätte, azattyq aludyŋ auyr jügın bırge köterısken aldyŋǧy-keiıngı serıkterıme de arnaiy rahmet aitamyn.
* * *
Taiauda «Täuelsızdık taǧylymy» atty maqalam jaryq körgenın bılesızder.
Ondaǧy elım dep emırenuden, Täuelsızdık dep tebırenuden tuǧan özekjardy oilarym men tarihi oqiǧalardy qaitalaudyŋ qajetı joq şyǧar.
Tek almaǧaiyp zamanda azuly men tıstınıŋ, küştı menen sūstynyŋ oljasy bolyp ketuden oŋai närse joq ekenın ǧana eske salyp ötkım keledı.
Sondyqtan jahandanu jalynyna jūtylyp ketpei, ūlttyq jaŋǧyrudyŋ negızın bırlese nyqtauymyz qajet.
* * *
Osydan otyz jyl būryn Tūŋǧyş Prezident retınde qyzmetıme kırıser aldyndaǧy saltanatta maǧan halqymyzdyŋ abyz aqsaqaly Şäkır Äbenov dana babalar dästürımen:
Tar asu, taiǧanaq jol, ker beleste,
El tızgının nyq ūstar sen emes pe?!
Halqyŋ süigen perzentı bol deitūǧyn,
Qart ataŋ toqsan bırde men emes pe?!
– dep aq batasyn bergen bolatyn.
Bataǧa qosa halyqtyŋ keleşekke degen ümıtı men arman-tılegın jetkızıp, amanat jüktegenı älı esımde.
Özım basşylyq etken otyz jylǧa juyq uaqyt boiy men halqymnyŋ senımınen şyǧuǧa bar küş-jıgerımdı jūmsap, sanaly ǧūmyrymdy el igılıgı üşın aianbai qyzmet etuge arnadym.
Eŋbegım aqtaldy dep oilaimyn.
Otanymyz Qazaqstan Respublikasy Ortalyq Aziianyŋ köşın bastap, TMD elderınıŋ törıne jaiǧasty.
Alpauyt eldermen üzeŋgı qaǧystyryp, ozyq memlekettermen teŋ därejede yntymaqtastyq ornatty.
* * *
Jyr alyby atanǧan babamyz Jambyl Jabaev kezınde: «Jambyl – menıŋ jai atym, halyq – menıŋ şyn atym», – deptı ǧoi.
Bügınde eŋbegımdı elegen el-jūrtym menı özınıŋ atyna ortaqtastyryp, «Elbasy» degen märtebe berdı.
Öz basym «El maǧan emes, kerısınşe men elıme ne beremın?» deumen kele jatqan adammyn.
Būdan da keiın, aqyrǧy demıme deiın tuǧan elımnıŋ tynys-tırşılıgıne alaŋdaumen öterım anyq.
* * *
Eŋ qiyn da kürdelı şeşımder qabyldar sätterde men ärdaiym qalyŋ elıme, qara orman halqyma arqa süiedım.
Maǧan ärdaiym senım artyp, barlyq bastamalaryma qoldau körsettıŋızder.
Sol üşın barşaŋyzǧa taǧy da rahmet!
* * *
Bız – tektı halyqtyŋ ūrpaǧymyz.
Ǧasyrlar boiy batyr babalar ūlan baitaq jerdı aq bılektıŋ küşımen, aq naizanyŋ ūşymen qorǧap, bızge miras ettı.
Men sol ata-babalar amanatyna ärdaiym adal boldym.
«El basyna kün tusa, er etıkpen su keşer» degendei, jūrtymnyŋ jarqyn bolaşaǧy üşın janymdy aiamadym.
Bügın, arada 30 jyl ötken soŋ, sol asqaq armandarymnyŋ oryndalǧanyn köru – men üşın zor baqyt.
Jetken barlyq biıkter – bızdıkı jäne bärımızdıkı.
Ony eşkım de joqqa şyǧara almaidy.
Men orda būzar jasqa endı tolǧan Qazaqstannyŋ bolaşaqta qazırgıden de quatty, älemge äigılı memlekettıŋ bırı jäne bıregeiıne ainalǧanyn qalaimyn ärı soǧan senemın.
* * *
Qazırgı künı bız aldymyzǧa ozyq 30 el qataryna qosylu jönınde örşıl maqsat qoiyp otyrmyz.
«Armansyz adam – qanatsyz qūs» degendei, elımızdı örkendetu jolynda bızge eşqaşan toqmeiılsuge, toqtap qaluǧa bolmaidy.
Jer kölemı jönınen älemde 9-şy oryn alatyn elımız basqa da barlyq baǧyt boiynşa bolaşaqta ozyq 10 memleket qataryna qosylsa dep armandaimyn.
Ūly mūrat jolyna belın bailaǧan ūltymyz, maqsatker de jasampaz jūrtymyz barda sol armanymnyŋ oryndalaryna sengım keledı.
Ardaqty äleumet!
Bardy baǧalaǧan – ozady, joqty qualaǧan – tozady.
Täuelsızdıkten qymbat qūndylyq, egemendıkten asqan bailyq joq.
Bız basymyzǧa baq bolyp qonǧan azattyqty aialai bıluımız kerek.
«Tırlık basqa bolsa da – tılek bır, Barmaq basqa bolsa da – bılek bır» degen atadan qalǧan ūlaǧatty söz bar.
Täuelsızdıktı jariialap, tūrlauly etu bızdıŋ buynǧa būiyrǧan baqyt ärı kielı boryş boldy.
Al sol Täuelsızdıktı qorǧau men el yrysyn eseleu – keler ūrpaqqa, jastarymyzǧa asyl paryz ärı amanat.
Zamanaui bılımmen qarulanǧan bügıngı jas tolqyn Täuelsızdıktıŋ jaŋa jylnamasyn jazyp jatyr.
Qazırgıdei aumaly-tökpelı uaqytta bärın tek bılım, ǧylym, taudai talap pen tabandy ızdenıs arqyly ǧana tolyq igerıp, bekem baǧyndyruǧa bolady.
Osy oraida, men täuelsızdık ūrpaqtaryna – jastarǧa zor ümıt artamyn jäne aq batamdy beremın.
Qūrmettı qazaqstandyqtar!
Bızge aldaǧy uaqytta beibıtşılıktı jaqtaityn saiasatymyz ben halyqtyŋ äl-auqatyn jaqsartu baǧytyndaǧy igı äreketterımızdı jalǧastyra beru kerek.
Köpşılık halyqtyŋ qoldauymen resmi joǧary bilık tızgının qolyna alǧan Memleket basşysy Qasym-Jomart Kemelūly Toqaev bügınde strategiialyq baǧdarymyzdy laiyqty jalǧastyryp, eldı tiımdı basqaryp keledı.
Elı erıne sengen, erı elıne süiengen joraly jūrtymyzdyŋ erteŋı būdan da jarqyn bolaryna kümänım joq.
* * *
Yntymaq pen bırlıktı tu etken el kez kelgen tar jol, taiǧaq keşuden sürınbei ötetını anyq.
Ony otyz jylda özgege de, özımızge de dausyz däleldedık.
Endeşe, eldıktıŋ altyn arqauyndai ūlttyq auyzbırlıgımızdı ardaqtap, Täuelsızdıktı közdıŋ qaraşyǧyndai saqtauymyz kerek.
Sondyqtan ärdaiym tūǧyrymyz – tynyştyq, tılegımız tatulyq boluǧa tiıs.
Qymbatty otandastar!
Täuelsızdıktıŋ 30 jyldyǧy – jasampaz Qazaqstan tarihynyŋ jaŋa bır belesı.
Elımız mäŋgılıkke baǧyt ūstaǧan ūzaq joldyŋ älı de basynda dep sanaimyn.
Ūlt bolyp attanǧan sol ūly joldaǧy alysty közdegen saparymyz sättı bolsyn!
Barşamyzdy babalar aruaǧy qoldap, halqymyzdy beibıtşılık pen berekeden aiyrmasyn.
HHI ǧasyr Qazaqstannyŋ «altyn ǧasyryna» ainalsyn.
Täu eter kiemız – Täuelsızdık jasasyn!
Egemendıgımız baiandy, eldıgımız mäŋgı bolsyn!
“Adyrna” ūlttyq portaly
