Halyqaralyq túrki mádenıeti yntymaqtastyǵy uıymy N.V.Gogol atyndaǵy Qaraǵandy oblystyq ámbebap ǵylymı kitaphanasyna osy ýaqytqa deıin shyǵarylǵan kitaptaryn syıǵa tartty.
Olardyń arasynda "Abaı", "Úsh arys", "Shyńǵys Aıtmatov", "Oljas Súleımenov" art-albomdary, Jambyl Jabaev, Muqaǵalı Maqataev jáne t.b. aqyndarymyzdyń týyndylary bar. Sondaı-aq túbi bir túrki elderiniń ózge memleketteriniń tarıhy jaıynda kitaptar tartý etildi.
Shara Táýelsizdiktiń 30 jyldyǵyna oraılastyryldy. Saltanatty jıynǵa TÚRKSOI uıymynyń Bas hatshysy Dúısen Qaseıinov, Qaraǵandy oblysynyń jáne qalalyq ákimshiliktiń ókilderi, zııaly qaýym men jýrnalıster qatysty.
Jıynda sóz alǵan TÚRKSOI Bas hatshysy Dúısen Qaseıinov:
"Táýelsizdik jyldary halyqaralyq TÚRKSOI uıymy ádebıet salasynda úlken jumystar atqardy. Osy ýaqytqa deıin túrki áleminiń 150-den astam kitabyn shyǵardyq. Olardyń arasynda Qazaqstanǵa qatysty týyndylar barshylyq.
Bıyl Muqaǵalı Maqataevtyń 90 jyldyǵyna oraı biz aqynnyń shyǵarmalaryn 7 tilge aýdardyp, arnaıy kitap retinde basyp shyǵardyq. Túrkııanyń Ankara, Kastamoný qalalarynda aqynymyzdyń urpaqtaryn arnaıy shaqyryp tusaýkeser rásimin jasadyq. Jambyl atamyzdyń 175 jyldyǵyna oraı Jambyl Jabaev tańdamaly shyǵarmalarynyń túrik tiline aýdarylǵan kitabyn basyp shyǵardyq",-dedi.
Aıta ketý kerek TÚRKSOI uıymy buǵan deıin óz kitaptaryn Almaty qalasynyń kitaphanalaryna tartý etken bolatyn.
“Adyrna” ulttyq portaly
