Bıylǵy jyldyń qyrkúıek aıynan bastap Nur-Sultan qalasynda «JAS MEDIA CLUB» atty jas jýrnalısterge arnalǵan joba bastaý aldy. Jobanyń maqsaty — qazaq tildi kontentti damytýda jas jýrnalısterdiń pýlyn qalyptastyrý, sondaı-aq olardyń bilimi men daǵdylaryn arttyrý.
Jastar jobaǵa sońǵy 3 aı aralyǵynda oflaın kezdesý formatynda semınar-trenıngter, master-klasstar sııaqty túrli netvorkıngterge qatysty. «JAS MEDIA CLUB» jobasyna kásibı bilikti jýrnalıster spıker retinde óz tájirıbesimen bólisýge shaqyryldy. Olar óziniń bar bilgenin jastarmen bólisip, pikir almasty.
Jobanyń uıymdastyrýshysy, jastar qyzmetkerleri qaýymdastyǵy atqarýshy dırektorynyń orynbasary Aıdar Hamıttiń aıtýynsha, bul joba elimizde alǵash ret ótkizilip otyr.
— Medıa jáne jýrnalıstıkaǵa qyzyǵýshylyǵy bar jáne bul baǵytta belsendi jumys jasaǵysy keletin jastar bolsa, olardyń damýyna qoldaý kórsetý maqsatynda osy jobany dástúrli túrde ótkizý kózdelip otyr,- deıdi ol.
«JAS MEDIA CLUB» jobasy aıasynda jas jýrnalısterge arnalǵan 10 kezdesýden turatyn, jalpy medıa men jýrnalıstıka, salalyq jýrnalıstıka, jýrnalıstıkadaǵy quqyqtyq aspektileri, fotografııa negizderi, mýltımedıany paıdalaný men blogıng, storıtellıng jáne analıtıkalyq taldaý, telearnalardaǵy til tazalyǵy nemese redaktýradaǵy medıa saýattylyq, jańalyq taratý, shuǵyl aqparat taratý nemese aqparat alańyndaǵy tilshi jumysy jáne PR taqyrybyn qamtıtyn kýrstar, dárister men master-klastar ótkizildi.
Joba aıasynda ózderiniń kásibı tájirıbesimen L.N.Gýmılev atyndaǵy Eýrazııa Ulttyq ýnıversıteti «Teleradıo jáne qoǵammen baılanys» kafedrasynyń meńgerýshisi, fılologııa ǵylymdarynyń kandıdaty, belgili aıtysker, aqyn Serikzat Dúısenǵazy, «Qazaqparat» halyqaralyq aqparattyq agenttiginiń redaktory, jýrnalıst Ádilbek Japaq, «Qazaqstan» ulttyq telearnasynyń shef-redaktory, jýrnalıst, bloger Nurbek Bekbaý, Sáken Seıfýllın atyndaǵy Qazaq agrotehnıkalyq ýnıversıtetiniń baspasóz hatshysy, jýrnalıst Berdibek Habaı, «Adyrna» ulttyq-etnografııalyq portalynyń jetekshisi, kásibı jýrnalıst Arman Áýbákir, «Quqyqtyq Medıa-ortalyq» kommerııalyq emes uıymynyń jetekshisi, quqyq jáne jýrnalıstıka salasyndaǵy sarapshysy, jýrnalıst Dıana Okremova, «Astana IT university-niń» oqytýshysy, dıktor, jýrnalıst Bogdan Petrov, jastar arasyndaǵy tanymal bloger, jýrnalıst, kopıraıter Bekarystan Nurlanuly, fotograf, «Jastar life» jastar ınternet kanalynyń fototilshisi, «Fotoóner» QB múshesi Meıirbek Tajkýranov, «QazAqparat» halyqaralyq aqparat agenttiginiń tilshisi Dáýlet Iztileýov, «TANBA» agenttiginiń atqarýshy dırektory, PR mamany Aqsulý Sańǵalı, t.b bólisti.
Shara barysynda jobaǵa belsendi qatysqan jastarǵa sertıfıkattar tabystaldy.
Uıymdastyrýshylardyń aıtýynsha, joba jas jýrnalıstterdiń medıa jáne jýrnalıstıka salasynyń qyr-syrymen tanysýyna úlken múmkindigin beredi. Joba barysynda alynǵan bilim men daǵdylar, tájirıbeler qatysýshylarǵa óziniń kásibı deńgeıin arttyrýǵa jáne jýrnalıstıka salasynda alǵashqy qadam jasap, ary qaraı damýyna septigin tıgizedi.
Ulbosyn TYNYShBAI.
