Mobildı tölemder turaly salyq normasy 1 nauryzda küşıne enedı. Būl turaly QR Qarjy ministrlıgınıŋ baspasöz qyzmetı mälım ettı, dep habarlaidy QazAqparat tılşısı. «Jaqynda «Salyq jäne biudjetke tölenetın basqa da mındettı tölemder turaly» kodekske (Salyq kodeksı) tüzetuler engızıldı.
Engızılgen özgerıster salyqtyq äkımşılendırudıŋ tiımdılıgın arttyruǧa, köleŋkelı ekonomikanyŋ ülesın azaituǧa jäne adal biznestı qoldauǧa baǧyttalǧan», - dep jazady ministrlıktıŋ baspasöz qyzmetı. Resmi organnyŋ mälımetı boiynşa, zaŋdy äzırleuge «Atameken» ūlttyq käsıpkerler palatasy men Qazaqstan qarjygerler qauymdastyǧy, ekınşı deŋgeilı bankter atsalysqan. «Būl normalar käsıpkerlık maqsattaǧy mobildı tölemderdı jeke tūlǧalardyŋ jeke audarymdarynan ajyratuǧa mümkındık beredı, Qarjy ministrlıgı jeke tūlǧalardyŋ jeke audarymdaryna salyq salynbaitynyn airyqşa atap ötedı. Zaŋnamada «mobildı audarym» jäne «mobildı tölem» ekı bölek körsetılgen. Soŋǧysy tauarlar men qyzmetterge aqy töleu üşın jüzege asyrylady. Būl salyq deklarasiialarynda käsıpkerlerdıŋ kırısterın dūrys körsetuge äkeledı», - delıngen mamandardyŋ tüsındırmesınde. Ministrlıktıŋ ūstanymy boiynşa, mobildı tölemderdı jeke tırkeu şarasy onlain audarym jasaityn adamnyŋ bärıne salyq jauapkerşılıgın jüktemeidı. Tek biznestıŋ qoldanystaǧy zaŋnamada qarastyrylǧan salyq mındettemelerın oryndauyna baǧyttalǧan. «Käsıpkerler būrynǧydai mobildı tölemdı alǧannan keiın tūtynuşyǧa kassalyq chek beruı kerek. Mobildı tölemge qatysty normalar 2022 jylǧy 1 nauryzdan bastap küşıne enedı. Käsıpkerlık qyzmet belgılerı bar ūtqyr tölemder boiynşa derektermen almasu tek 2025 jyldan bastap josparlanady», - dep jazady vedomstvonyŋ baspasöz qyzmetı.
"Adyrna" ūlttyq portaly
