Şymkenttıŋ jedel järdem jürgızuşılerı 22 jeltoqsanda narazylyqqa şyqty. Sebebı alǧan azǧantai jalaqymyz jan baǧuǧa jetpeidı. Onyŋ üstıne künde būzylatyn kölıkterdı özımız jöndeuge mäjbürmız deidı. Al stansa basşylyǧy jürgızuşıler kötergen mäseleden beihabar bolyp şyqty, dep habarlaidy “Adyrna” ūlttyq portaly 31 arnanyŋ “İnformbiuro” baǧdarlamasyna sılteme jasap.
Jedel järdem jürgızuşılerı tez arada basşylyq jalaqymyzdy köterıp bermese jūmysqa şyqpaimyz dep bekınıp otyr. Sebebı qazır alatyn ailyqtary şailyqtaryna jetpeidı. Aitularynşa, medisinalyq mekeme ūsynǧan kölıkter de jiı būzylady. Al stansada qajettı qosalqy bölşekter joq eken.
Aşynǧan jürgızuşıler stansada kölıktıŋ jarylǧan döŋgelegın jamaityn vulkanizasiia da joq dedı. Iаǧni keide kölıktıŋ jelın ürlep, döŋgelegın auystyru üşın saǧattap kezekke tūrady. Sözderınşe, jūmys babyndaǧy mūndai qiyndyqtardyŋ kesırınen kömek kütken nauqasqa jedel jetu mümkın emes. Al qalalyq densaulyq saqtau basqarmasynyŋ basşysy jürgızuşıler aitqan mäseleden habarsyz bolyp şyqty. Tıptı jaqynda ǧana jaŋa kölıkter aldyq dep aqtaldy.
“Maǧan jalaqy az, 200-300 myŋ dep ondai talap qoiatyn sızderdıŋ eşqandai qūqyqtaryŋyz joq. Sebebı bızde bärı zaŋmen, normativpen bekıtılgen. Naqty körsetıŋızder. Osy künı men osyndai qosalqy bölşektı satyp aldym, basqasyn. Sebebı ony satyp aluǧa tek qana osy jedel järdem podstansasynan alu kereksız”, – deidı Şymkent qalalyq densaulyq saqtau basqarmasynyŋ basşysy Baqytjan Pazylov.
Degenmen basqarma basşysy jalaqy kelesı jyldan bastap köterıledı dep sendırdı. Sondai-aq är jürgızuşıge 53 myŋ teŋge kölemınde üstemaqy berıledı eken. Al qosalqy bölşekterdı satyp alamyz degen uäjderıne qatysty ışkı tekseru jūmystary bastaldy.
“Adyrna” ūlttyq portaly
