Şymkent qalasyndaǧy Tūran şaǧyn audanynda byltyrǧy jyldan qūrylysy ötpelı 41 tūrǧyn üidıŋ qūrylysy jalǧasuda. Päter sany 2432 bolatyn üi jyl qorytyndysymen paidalanuǧa berılmek.
«Nūrly jer» memlekettık baǧdarlamasy aiasyndaǧy köpqabatty tūrǧyn üilerdıŋ qūrylys barysyn bügın qala äkımı Mūrat Äitenov aralap kördı. Öz baiandamasynda, qalalyq qūrylys basqarmasynyŋ basşysy Ä.Rabaev qūrylys materialdardyŋ otandyq önım ülesı 91 paiyzdy qūraitynyn mälımdedı.
Merdıgerlermen kezdesken şahar basşysy tūrǧyndar üşın baspana sapasy maŋyzdy ekenın aityp, jūmystyŋ qarqyny men sapasyn nazarda ūstaudy tapsyrdy.
«Memleket basşysy Qasym-Jomart Toqaev halyqty baspanamen qamtu mäselesın jıtı nazarda ūstaidy.
Būl baǧytta elımızde arnaiy baǧdarlamalar äzırlendı. Kezekte tūrǧan azamattardy tūrǧyn üimen qamtu üşın tūrǧyn üiler köptep salynuda. Bügınde qalamyzda 43 myŋnan astam adam kezekte tūr. Sondyqtan üilerdıŋ qūrylysyn jedeldetuımız kerek. Qūrylys jūmystaryn üzdıksız jürgızu üşın de Şymkenttıŋ aua raiyda yŋǧaily. Qajet bolsa, tüitkıldı mäselelerdı şūǧyl şeşu üşın apta saiyn kezdesıp otyraiyq»,- dedı M.Äitenov.
Sonymen qatar, qūrylys aumaǧynyŋ tazalyǧyna köŋıl böludı, ärkım öz jūmysynda basqasynyŋ eŋbegın baǧalau kerektıgın aitty.
«Nūrly jer» memlekettık baǧdarlamasy şeŋberınde Tūran şaǧyn audanyndaǧy 25, 26, 28, 29 oramdarda biudjet esebınen 88 üidıŋ qūrylysy josparlanǧan. Onyŋ ışınde 47 üi, iaǧni 3144 päter 2020-2021 jyly paidalanuǧa berılgen.
Osy jyly atalǧan şaǧyn audanda jalpy 2700 päterlı köpqabatty 50 tūrǧyn üidıŋ qūrylysy bastalady. Qazır jobalau-smetalyq qūjattamasy äzırlenude.
Şymkent qalasy äkımdıgınıŋ baspasöz qyzmetı
