Өзбекстанда 19 жастағы жігіт Өзбекстан президентіне жағымсыз пікір жазғаны үшін бас бостандығынан айырылды, деп хабарлайды "Адырна" тілшісі gazeta.uz басылымына сілтеме жасай отырып.
Instagram желісіндегі пікірі үшін Өзбекстан азаматы екі жарым жылға бас бостандығынан айырылды. Желі қолданушысы мемлекет басшысы Шавкат Мирзиеевке жағымсыз пікір жазған.
26 қазанда Самарқанд облысының Қаттақұрған аудандық қылмыстық істер жөніндегі соты 19 жасар Дильшод Искандаровты ҚК-нің 158-бабының 3-бөлігі бойынша "Өзбекстан Республикасының Президентіне қатысты көпшілік алдында қорлау немесе жала жабу" бойынша кінәлі деп таныды.
Сот жаздың басында Искандаров Президент Шавкат Мирзиеев туралы Instagram желісіндегі "President family" (ред. - Президент отбасы) бейнебаянының астында пікір қалдырғанын анықтады.
Сотталушы өз кінәсін мойындап, таныстарының кеңесі бойынша жазылған пікірді алып тастағанын айтты. Бірақ біраз уақыттан кейін оған қарсы қылмыстық іс қозғалған.
"Ол Шавкат Мирзиеевтің саясатына қарсы емес екенін мәлімдеді, бірақ жастығы мен түсініспеушілігіне байланысты Президент туралы қорлайтын сөздер жазды", — делінген сот шешімінде.
Сотталушы толығымен өкініп, соттан жазаны жеңілдетуді сұрады. Соған қарамастан сот оны кінәлі деп танып, екі жарым жылға бас бостандығынан айырды.
