Төтенше жағдайлар министрлігі электромобильдерді зарядтау станцияларына қойылатын талаптарды әзірледі, - деп хабарлайды "Адырна" тілшісі Төтенше жағдайлар министрлігінің баспасөз қызметіне сілтеме жасап.
Ведомство электр көліктері мен оларды зарядтау станцияларын қауіпсіз пайдалану мәселелерін шешу бойынша жұмыс жүргізіліп жатқанын хабарлады. Азаматтық қорғау саласындағы қолданыстағы заңнамаға сәйкес, министрлікте электр көліктеріне арналған электр зарядтағыштарын басқаруға рұқсат беру қарастырылмаған. Ведомство атап өткендей, қазіргі уақытта елімізде электр көліктеріне арналған электр зарядтағыштарының қауіпсіз жұмыс істеуін анықтайтын талаптар жоқ.
Төтенше жағдайлар министрлігі электромобильдер мен зарядтау станцияларын (АҚШ, Канада, Мексика, Нидерланды, Швейцария, Германия, Ұлыбритания және Ресей) пайдалану бойынша шет елдердің тәжірибесін зерттеді.
Министрлік Ресей мен Норвегия тәжірибесіне сүйене отырып, электр көліктері мен оларды зарядтау станцияларына қойылатын талаптарды әзірлеп, құрылыс нормаларына енгізу үшін Индустрия және құрылыс министрлігіне жіберді. Сонымен қатар, Сыртқы істер министрлігіне Қытай мен Түркиядан электр көліктері мен оларды зарядтау станцияларын тұрақтарға орналастыру бойынша нормативтік талаптарды алу туралы сұраныс жіберілді.
Ғабдуллин атындағы Азаматтық қорғаныс академиясында литий-иондық аккумуляторлардың құрамын, олардың әдістері мен өрт сөндіру тәсілдерін бақылау бойынша зерттеулер жүргізілуде. Сондай-ақ Төтенше жағдайлар министрлігі Сауда және интеграция министрлігіне электромобильдер мен оларды зарядтау станцияларына қатысты тиісті стандарттарды қабылдау қажеттігі туралы ұсыныс жолдады.
«Осы бағыттағы жұмыстар белсенді жүргізілуде, жақын арада мемлекеттік органдар Қазақстан Республикасының нормативтік құқықтық актілеріне және нормативтік-техникалық құжаттамаларына барлық қажетті түзетулерді, соның ішінде Өрт қауіпсіздігі қағидаларына кейінгі өзгерістер мен толықтыруларды енгізеді, », - деп хабарлады министрлік.
Еске сала кетейік, бұған дейін төтенше жағдайлар министрлігі жабық тұрақтарда көліктерге аккумулятор қуаттағыштарын орнатуға тыйым салынғанын мәлімдеген болатын.
