Қостанайдағы аулалардың бірінде салынып жатқан 19 қабатты жаңа үйдің құрылысы кейінге шегерілді, деп хабарлайды «Адырна» ұлттық порталы «Наша газета» сайтына сілтеме жасап.
Бейнежазбада Қостанай облысы әкімінің орынбасары Ерлан Спанов, Қостанай қаласы әкімінің міндетін атқарушы Алмат Исмағұлов, «NurComBuilding» ЖШС директоры Иван Марар мен өз ауласында тұрғын үй кешенінің салынуына қарсылық білдірген үй тұрғындарының кездесуі түсірілген.
Құрылыс компаниясының басшысы «Елена и Д» компаниясына тиесілі жерде 19 қабатты ғимарат та, басқа да тұрғын үй салмайтынын хабарлады. Қала әкімдігі тұрғындарға құрылыс салушы компаниямен бірлесіп осы учаскенің болашақ тағдыры бойынша басқа да ұсыныстарды қарастыратынын хабарлады. Назарбаев көшесіндегі №137/1 үйдің тұрғындары осы жерге мемлекеттік тілді дамыту орталығы немесе спорт залын салу туралы ұсыныстарын білдірді.
Бұған дейін Қостанай қаласының әкімі Марат Жүндібаев құрылыс краны құлаған жерге жақын маңдағы үйлердің тұрғындарымен кездесуінде осы аудан мен жер учаскесінде салынып жатқан құрылысты ескере отырып, қала әкімдігінің 19 қабатты тұрғын үйдің құрылысын қолдамайтынын айтқан болатын.
Еске сала кетейік, Қостанайда көпқабатты үйдің құрылыс алаңында кран опырылып құлап, салдарынан 49 жастағы кран жүргізушісі оқиға орнында көз жұмды. Қайғылы оқиға 30 қараша күні сағат 12:50-де Шаяхметов көшесінде болған.
«Адырна» ұлттық порталы
