Ашхабадта тұратын тәуелсіз журналист Солтан Ачилова Түркіменстан президенті Сердар Бердімұхамедов пен оның әкесі, Халық мәслихатының төрағасы Гурбангулы Бердімұхамедовке видео үндеу жолдады, деп хабарлайды "Адырна" ұлттық порталы.
Ол оларды өтірік айтты, ел экономикасын құлдыратты, білім саласындағы жемқорлық, кедей халықтың өміріне бей-жай қарады деп айыптады.
«Баяғының ақындары айтқандай, күнәға батқан байлар өз елін құртып жатқан заманда өмір сүріп жатқаныма қатты өкінемін. Ел басшылары, Бердімұхамедовтер! Елдің табиғи байлығын өз мүдделеріңізге пайдаланып, қажетсіз құрылыстар салуға ақша жұмсап, ел экономикасын күйретіп жатырсыздар. Кедей кедейленеді, сенің кінәңнен мезгілсіз өледі. Сіздер денсаулықты құрттыңыздар және адамдардың өмір сүру ұзақтығы күрт қысқарды. Базарлардағы өнімнің көптігін айтасыз, бірақ оның бағасы халықтың басым бөлігіне қолжетімсіз. Халықтың жартысы тіпті нанға да ақша таба алмай, жоқшылықта күнелтіп жүр. Теледидардан халықтың тауық етімен қамтамасыз етілгенін айтады. Бұл ең арзан ет өнімі. Бірақ іс жүзінде олай емес. Қазір күн суықта тауық етін немесе жұмыртқа сатып алу үшін халық кезекке тұруда. Бірақ бұл өнімдер Иран мен Түркиядан да жеткізіледі. Елді тіпті өз өнімдеріңізбен де қамтамасыз етіп отырған жоқсыз. Халық қолжетімді бағадағы негізгі азық-түлік өнімдерімен – ұн, нан, тауық еті, жұмыртқамен қамтамасыз етілмеген" деп барлық мәселелерді тізіп берді Ачилова.
Сондай-ақ, ол елдегі ауыз су жетіспеушілігі мәселесін де алға тартып, елдің жұтап бара жатқанын айтты.
"Халық жұтап барады. Ал сіз болсаңыз өтірік есептерге қуанып жүрсіз. Берзенгідегі бас және мойын емдеу орталығында төсек-орындарда матрацтар мен жастықтар жоқ, науқастар төсек-орындарын, тіпті дәрі-дәрмегін де өзімен бірге алып келуі керек. Сонымен қатар, олардан жоқ азық-түлік үшін ақша сұратуда" деп қосты ол.
"Әкелі-балалы Бердімұхамедовтер, халықтың азабы үшін, уақыт келгенде, сендерді ештеңе құтқармайды. 52 қажылық жасасаң да. Халыққа жасаған қиянаттарың үшін жауап беруге тура келеді. Мұны есте сақтаңыз. Сізді Меккеге қажылыққа бару және қарапайым халықтың қалтасынан алатын ақшаларыңыз (садақаларыңыз) қорғамайды. Сіз қамқорлыққа мұқтаж балаларға көмек көрсету қорын құрдыңыз. Бірақ оны толықтыру үшін халықтан ақша алып жатсыз. Табиғи ресурстарға бай елде шынымен мұқтаж адамдар болуы мүмкін бе? Қамқорлыққа мұқтаж балалар бар ма? Сіз өз әрекеттеріңізден ұялмайсыз ба?» деді әйел президентке.
Толығырақ видеода:
