Шымкентте жүк пойызы жас жігітті басып кеткен, деп хабарлайды "Адырна" тілшісі Оtyrar.kz сайтына сілтеп.
Оқыс оқиға 8 наурыз күні болған. Қаладағы Жиделібайсын көшесінде жүк пойызы жас жігітті қағып кеткен.
Куәгерлердің сөзінше, 18-20 жас аралығындағы жігітті жүк тиелген пойыз 20-30 метрге жерге сүйреп кетіпті.
Полиция департаменті аталған жағдай бойынша сотқа дейінгі тергеу жүріп жатқандығын мәлімдеді.
"Шымкент стансасындағы желілік полиция бөлімі абайсызда адам өліміне әкеп соққан жол қозғалысы немесе теміржол көлігін пайдалану қауіпсіздігі ережелерін бұзу фактісі бойынша сотқа дейінгі тергеу амалдарын жүргізуде. Қазақстан Республикасы Қылмыстық-процестік кодексінің 201-бабының талаптарына сәйкес өзге де мәліметтер тергеу мүддесі үшін жария етілуге жатпайды", - делінген хабарламада.
БАҚ мәліметінше, жас жігіт қайтыс болды.
