Qazaqstan Respýblıkasynyń Premer-mınıstri Oljas Bektenov Reıhstagqa tý tikken halyq qaharmany Raqymjan Qoshqarbaevtyń eskertkishine gúl shoqtaryn qoıdy. Bul týraly úkimettiń baspasóz qyzmeti jarııalady, dep habarlaıdy “Adyrna” ulttyq portaly.
Sharaǵa jınalǵandar soǵys jyldarynda qaza tapqan jaýyngerler men beıbit ómirge oralyp, búginde marqum bolǵan barsha ardagerdi bir mınýt únsizdikpen eske aldy.
"Adamzat tarıhyndaǵy eń surapyl soǵysta qazaqstandyqtar da teńdessiz erlik pen eren eńbektiń dańqty úlgisin kórsetti. Uly Jeńis qaharmandarynyń arqasynda búgingi urpaq beıbit elde ómir súrip, kemel bolashaqqa nyq senimmen qadam basyp otyr", - dedi Bektenov óz sózinde.
Ol Uly Jeńis qaharmandarynyń esimi eshqashan umytylmaıtynyn aıtty.
"Aıbyndy batyrlarymyz Baýyrjan Momyshuly, Saǵadat Nurmaǵambetov, Raqymjan Qoshqarbaev, Álııa Moldaǵulova, Mánshúk Mámetova, Hıýaz Dospanova, Málik Ǵabdýllın, Talǵat Bıgeldınov syndy basqa da kóptegen otandastarymyzdyń maıdan dalasyndaǵy erlikterine máńgi taǵzym etemiz. Halqymyz týǵan jerimizdi qorǵap qalǵan soǵys ardagerleri men tyl eńbekkerleriniń esimderin árdaıym ulyqtaı bermek", — dedi Bektenov.
