Қазақстан Президенті Қасым-Жомарт Тоқаев Қордай ауданындағы қақтығыстың кімнің кесірінен болғанын айтты, - деп хабарлайды Tengrinews.kz тілшісі.
Бұл туралы Тоқаев Twitter желісінде жазды.
Qasym-Jomart Toqayev✔@TokayevKZ
Бұл күндері азаматтарымыздан көптеген өтініштер келіп түсуде. Дүнген баласының бейнежазбасына назар аудардым. Жауап беремін: Менің міндетім - елімізде бейбітшілік пен келісімді қамтамасыз ету.
Мемлекеттік органдар қызметкерлерінің салғырттығы арқасында арандатушылар қантөгіс жасады. Олар жазаланады. Мемлекет зардап шеккендерге қолдау көрсетеді. Бейбітшілік пен келісім біздің басты байлығымыз, оны бұзуға ешкімнің құқығы жоқ!
Сонымен қатар, Қордай ауданында жағдайдың тұрақты екенін, Бердібек Сапарбаев басқарқан комиссия жұмысын жалғастырып жатқанын айтты.
"Қайғылы жағдайға жол берген меморган қызметкерлері мен арандатушылар жауапқа тартылады. Зардап шеккендерге көмек көрсетіледі. Отандастарымызға азаматтық жауапкершілік ұстанымдары үшін ризашылық білдіремін", - деп жазды Тоқаев.
Кеше, 8 ақпанда Қордай ауданында төтенше жағдай режимі жарияланған болатын.
Еске салайық, 7 ақпанда Жамбыл облысы Қордай ауданы Масанчи ауылында тұрғындар арасында жаппай төбелес болды. Оқиға салдарынан 8 адам қаза тапты. Медициналық мекемелерге 137 адам көмек сұрап келді.