Qazaqstanda 10 qańtar kúni bolatyn Parlament saılaýyna ár partııa ózinshe úgit nasıhat júrgizip jatyr. Bireýleri esim-soıy elge belgili azamattardy partııa qataryna qosap jatsa, endi bireýleri el aldynda júrgen ónerpazdardyń kómegine júgingen. Bıliktegi «Nur Otan» partııasy da Qazaqstan estradasynyń ókilderi men sportshylardy osy úgit-nasıhat jumystaryna qosqan eken dep habarlaıdy «Adyrna» ulttyq portaly Abai.kz.saıtyna silteme jasap.
Olardyń qatarynda QR Halyq ártisteri Roza Rymbaeva, Maqpal Júnisova, QR Eńbek sińirgen qaıratkeri Madına Sádýaqasova, «Qazaqstan barysy» týrnıriniń úsh márte jeńimpazy Beıbit Ystybaev, aqyn, «Qurmet» ordeniniń ıegeri Aqushtap Baqtygereeva syndy belgili adamdar bar.
Alaıda, partııa ókilderi «Nur Otan-dy» qoldaǵan ártisterdiń qataryna Dımash Qudaıbergendi de qosyp jibergen sekildi. Sebebi, áleýmettik jelide «10-shi qańtarda «Nur Otan-ǵa» daýys ber! Qazaqstannyń bolashaǵy kóshbasshymyz Nursultan Ábishulymen birge!!!», dep jazylǵan Dımashtyń sýreti taralǵan.
Buǵan qatysty ánshiniń ákesi áleýmettik jelide eskertý jarııalady. Onyń aıtýynsha, Dımash ómirlik ustanymy boıynsha eshqandaı saıası naýqanǵa qatyspaıdy.
Aıta keteıik, Dımash Qudaıbergen 17 qańtar kúni AQSh-tyń jańadan saılanǵan prezıdenti Djozef Baıdenniń ınaýgýraııasyn toılaý aptalyǵynyń ashylý saltanatyna qatysady. Al, odan bir kún buryn, 16 qańtarda qazaqstandyq ánshiniń «DIMASH DIGITAL SHOW» atty alǵashqy onlaın-konerti ótedi dep josparlanǵan.
