"مۋزارت" توبىنىڭ ءسوليسى، قازاقستاننىڭ ەڭبەك سىڭىرگەن قايراتكەرى، ءانشى مەيرامبەك بەسپاەۆ ءوزىنىڭ Instagram پاراقشاسىنا ۇندەۋ جاريالاپ، 5 ماۋسىم كۇنى وتەتىن رەفەندۋمدا بەلسەندى بولۋعا شاقىردى، دەپ حابارلايدى “ادىرنا” ۇلتتىق پورتالى.
“مەن ءانشى مەيرامبەك بەسباەۆ. ەكى ماسەلە بويىنشا ءوز پىكىرىمدى ءبىلدىرىپ، ءۇن قوسقىم كەلەدى.
ەڭ ءبىرىنشى، ء"تىل تۋرالى زاڭنىڭ" 5- بابىندا: "مەملەكەتتىك ۇيىمداردا جانە جەرگىلىكتى ءوزىن-ءوزى باسقارۋ ورگاندارىندا ورىس ءتىلى رەسمي تۇردە قازاق تىلىمەن تەڭ قولدانىلادى" دەگەن ءماتىندى الىپ تاستاۋدى تالاپ ەتەمىن. ءتىلىمىز ءوز مارتەبەسىن الۋى ءتيىس. ەلىمىز كوپ ۇلتتى مەملەكەت بولسا دا، بۇل ەلدىڭ يەسى - قازاق، بۇل ەلدىڭ ءتىلى قازاق، بۇل ەلدە مۇددەسى بيىك تۇرۋى ءتيىس ءتىل - ول قازاق ءتىلى!”،- دەپ جازدى ءانشى.
سونداي-اق، ول ونەر سالاسى مەن مادەنيەت وكىلدەرىن سۇزگىدەن وتكىزىپ، تىيىم سالىنسىن دەدى.
“ەكىنشى، تالاپ: ەلىمىزدە ونەر سالاسىندا سۇزگى نەمەسە تالاپ ەنگىزىلسىن.
- انايى ءسوز، ماعىناسىز ولەڭدى ءان قىلىپ ايتقان انشىگە;
- "سارى پرەسسا" دەپ بۇركەنىپ، ءبىر اۋىز ءسوزدى ءىلىپ الىپ، وزگەرتىپ، جالا جاۋىپ، جالعان اقپارات تاراتىپ كەتەتىن، ساۋاتسىز "جۋرناليستكە";
- حايپ قۋىپ، رەيتينگ قۋىپ ، بالانىڭ ساناسىن ۋلايتىن، پايداسىنان زيانى كوپ، بىرەۋدىڭ توسەگىن، ءبىر ەلدىڭ وسەگىن ءسوز ەتەتىن باعدارلاماعا;
- ۇياتسىز فيلمدەر، باعدارلامالار بەرەتىن تەلەارنالارعا;
- بوقاۋىزعا تولى كونتەنت جاسايتىن يۋتۋب كانالدارعا;
- نەگىزسىز اقپارات تاراتاتىن كەز كەلگەن باق وكىلىنە;
- ساحنا مادەنيەتىن، ەتيكاسىن ساقتاماعان ونەر ادامىنا;
ناقتى تالاپ، تيىم بولسىن.
جاڭا قازاقستان ءبىر كۇندە قۇرىلمايدى. ونى ءسىز بەن ءبىز قۇرامىز. ءار نارسەگە نەمقۇرايلىق تانىتىپ، ءوزىمىز ۇيدە ءۇش ساعات ەفير كورىپ وتىرا بەرمەي، رەفەرەندۋمدا بارلىعىمىز بەلسەندى بولايىق”، - دەپ بىرلىككە شاقىردى م.بەسپاەۆ.
“ادىرنا” ۇلتتىق پورتالى
