"Mýzart" tobynyń solısi, Qazaqstannyń eńbek sińirgen qaıratkeri, ánshi Meırambek Bespaev óziniń Instagram paraqshasyna úndeý jarııalap, 5 maýsym kúni ótetin refendýmda belsendi bolýǵa shaqyrdy, dep habarlaıdy “Adyrna” ulttyq portaly.
“Men ánshi Meırambek Besbaev. Eki másele boıynsha óz pikirimdi bildirip, ún qosqym keledi.
Eń birinshi, "Til týraly zańnyń" 5- babynda: "Memlekettik uıymdarda jáne jergilikti ózin-ózi basqarý organdarynda orys tili resmı túrde qazaq tilimen teń qoldanylady" degen mátindi alyp tastaýdy talap etemin. Tilimiz óz mártebesin alýy tıis. Elimiz kóp ultty memleket bolsa da, bul eldiń ıesi - Qazaq, bul eldiń tili qazaq, bul elde múddesi bıik turýy tıis til - ol Qazaq tili!”,- dep jazdy ánshi.
Sondaı-aq, ol óner salasy men mádenıet ókilderin súzgiden ótkizip, tyıym salynsyn dedi.
“Ekinshi, talap: elimizde óner salasynda súzgi nemese talap engizilsin.
- Anaıy sóz, maǵynasyz óleńdi án qylyp aıtqan ánshige;
- "Sary pressa" dep búrkenip, bir aýyz sózdi ilip alyp, ózgertip, jala jaýyp, jalǵan aqparat taratyp ketetin, saýatsyz "jýrnalıstke";
- Haıp qýyp, reıtıng qýyp , balanyń sanasyn ýlaıtyn, paıdasynan zııany kóp, bireýdiń tósegin, bir eldiń ósegin sóz etetin baǵdarlamaǵa;
- Uıatsyz fılmder, baǵdarlamalar beretin telearnalarǵa;
- Boqaýyzǵa toly kontent jasaıtyn ıýtýb kanaldarǵa;
- Negizsiz aqparat taratatyn kez kelgen BAQ ókiline;
- Sahna mádenıetin, etıkasyn saqtamaǵan óner adamyna;
Naqty talap, tıym bolsyn.
Jańa Qazaqstan bir kúnde qurylmaıdy. Ony Siz ben Biz quramyz. Ár nársege nemquraılyq tanytyp, ózimiz úıde úsh saǵat efır kórip otyra bermeı, referendýmda barlyǵymyz belsendi bolaıyq”, - dep birlikke shaqyrdy M.Bespaev.
“Adyrna” ulttyq portaly
