Búgin Alash arystary negizin qalaǵan «Qazaq» gazetiniń jaryqqa shyqqanyna 110 jyl. Osyǵan qatysty QR Aqparat jáne qoǵamdyq damý mınıstri Darhan Qydyráli óziniń feısbýk paraqshasynda pikir qaldyrdy, dep jazady "Adyrna" ulttyq portaly.
- 2 aqpan – ult jýrnalıstıkasy men rýhanııaty úshin ataýly kún. Sebebi, osydan 110 jyl buryn HH ǵasyr basyndaǵy úmit pen úreıdiń arasyndaǵy arpalys kúreste ulttyń joǵyn joqtap, qajetin túgendegen «Qazaq» gazetiniń alǵashqy nómiri shyqqan edi. Gazet ulttyq renesanstyń bastaýynda turyp, halqymyzdyń aqyl-oıyn, sana-sezimin múlde bólek arnaǵa burdy. Ahmet Baıtursynuly, Álıhan Bókeıhanuly, Mirjaqyp Dýlatuly sekildi ult zııalylarynyń esimderimen ushtasyp jatqan basylym – talaı tarıhtyń kýási, halyqtyń rýhanı qazynasy. Ult ustazy A.Baıtursynulynyń «Gazet – halyqtyń kózi, qulaǵy hám tili» degen áıgili sózi «Qazaq» gazetiniń alǵashqy sanynda jaryq kórgen maqalada aıtylǵan edi. Bul sóz ǵasyrdan asa ýaqyt boıy qazaq baspasóziniń damýyna demeý bolyp, uranyna aınaldy. «Qazaq» gazeti qaı zamanda da halyqtyń únin jetkizip, ýaqyt synyna tózip, ózindik sony súrleýin qalyptastyrdy", - dep jazdy mınıstr.
Onyń aıtýynsha, «Qazaq» gazeti jaryq kórgen kúnnen bastap ulttyń eń taǵdyrsheshti de ótkir máseselerin qaýzady.
- «Qazaqtyń tarıhy», «Din talasy», «Jer izdegen qazaqtar!», «Qazaqtan soldat ala ma?», «Zemstvo ne nárse?», «Ury tııý» sekildi ulttyń jan-júregin syzdatqan ózekti taqyryptardy jurtpen birge talqyǵa saldy. Tarıhqa qarap otyrsaq, «Qazaqtyń» jalpy 266 nómeri jaryq kóripti. Alǵashqy 40 nómirin Mustafa Orazaev bastyrsa, 41 nómirinen bastap «Azamat seriktigi» arqyly basyldy. 1913 jyly 44, 1914 jyly 48, 1915 jyly 71, 1916 jyly 48, 1917 jyly 46, 1918 jyly 9 nómiri jaryqqa shyqty. Sońǵy №266 sany – 1918 jyly 26 qyrkúıekte oqyrman nazaryna usynyldy. Táýelsiz eldiń búgingi baspasózi de «Qazaq» gazetiniń azatkerlik izimen el qajetine jumys istep jatyr. «Qazaq gazetteri» degen ardaqty atty arqalaǵan jańa qurylym da ata basylymnyń dáýirlik júgin arqalap, bolashaq úshin qyzmet qylar dep senemiz. «Qazaq» gazetiniń 110 jyldyǵy laıyqty atap ótiledi. Shyǵatyn ǵylymı saraptamalar, arhıvten alynatyn tyń materıaldar men túrli televızııalyq túsirilimder ult baspasózi temirqazyǵynyń atyn asqaqtatary sózsiz",- deıdi Darhan Qydyráli.
"Adyrna" ulttyq portaly
