Amerıkandyq jazýshy O. Genrı qysqa ertegi jazýdyń has sheberi. «Sońǵy japyraǵy" ónerdiń ólimge de, ómirge de sebepker bolatynyn uqtyrdy. Bul týraly "Adyrna" ulttyq portaly jazady.
Úsh sýretshini ushtastyratyn qyl qalam men aq qaǵaz. Eki jaqtan kelgen qyzdy ajyramas dos etken de osy óner.
Aıyqpas dertke shaldyqqandaı kúı keship, úmitten kúderin úzgen Djonsıdi qutqarǵan qyl qalamnyń kúshi men úzeńgi japyraq.
Ǵumyryn japyraqqa teńegen Djonsıdiń basty qateligi – kúresýden qashý, moıyn usyný. Óziniń asa qymbat, qundy ýaqytyn bes japyraqtyń beline tańǵan Djonsı qalaı tiri qaldy?
Tipti tiri kezinde tirshilikten bezip, terezege tanylǵan boıjetkenniń ómirin qutqarǵan «tól týyndy». Bermannyń bar ǵumyr ańsaǵan eksklıýzıv sýreti – sońǵy japyraq.
Djonsıdi sergeldeńge salyp, serigine bergen sertinen taıdyrǵan dál osy japyraqty týyndy qyla tura, óz ómirin qıyp, ózgenikin saqtap qaldy. Alaıda, saqtaǵan sýret emes, senim...
Bermanda ónerge degen mahabbat bar. Biraq mashaqaty materıaldyq problema. Armanyndaǵy alyp kartınany salý úshin qarııa keıpin kútkendeı aq. Jazmyshtyń jazǵany bolar, dál osy jazataıym oqıǵa onyń armanyn oryndady. Bálkim, Berman aýrýhanaǵa kelip, Djonsımen kezdespegende senimdi de, sezimdi de «sońǵy japyraq» máńgilikke alyp keter me edi?
Djonsıdiń qulazyǵan kóńil kúıi Bermannyń qushtarlyǵyn oıatty. Shıelenisken shabytqa shyraq kómektesti. Túńilgen Djonsıdiń uıqyǵa batqan kezin kútken Berman túni boıy telmirip, tól týyndysyn aqyry salyp shyǵady. Týyndy ómirge keldi, ózi ketti, ózgeni qutqardy...
PS: Ár adamnyń ishki dúnıesi shyǵarmamen sharyqtaıdy. Biri ánshi, biri bıshi, biri aqyn, biri sýretshi, biri jazýshy. Ár túrli baǵyt. Biraq olar bir shańyraq astynda. Ol óner...
Áleýmettik máseleni áńgimemen jetkize bilgen avtordyń ózi de óner ıesi. Qıyndyqtan qashýdyń birden bir joly «ólý» dep sanaıtyn sanasyzdar kóp. Múmkin, taǵdyr olardy talanǵa saldy, múmkin, ómirden kóp ókinish tartty.
Biraq oǵan óz qolymyzben balta shabý – ádiletsizdik. Túbi ketetin máńgi dúnıege nege asyǵamyz? Bir qyzyǵy adamnyń senimi áli san ǵasyrdy jalǵaıtyn ıa bolmasa ony úzetin qudiretti kúsh.
Qarııanyń qııaǵa attanýy men boıjetken boıyna bitken baqytty kúı – ómirdiń qosyndysy men aıyrmasy. Jandy alatyn da beretin de jaratqan. Bireý kelgenimen, bireýdiń ketetini ókinishti...
Injý ÓMIRZAQ,
"Adyrna" ulttyq portaly
