وزبەكستاندا ورىن العان جاعدايعا قاتىستى ەلدەگى بەلسەندى ساياساتكەر دوس كوشىمنەن "ادىرنا" ءتىلشىسى ارنايى پىكىر الدى.
نۇكىستەگى كوتەرىلىستىڭ "قاڭتار قىرعىنىمەن" ۇقساستىعى جايلى
مىندەتتى تۇردە ۇقساستىق بولادى. سەبەبى، ەكى ەلدەگى حالىقتى كوشەگە شىعارعان جاعدايدىڭ باعىتى ءبىر. باعىتى - حالىقتىڭ نارازىلىعى. سوندىقتان دا، ەلدىڭ باسشىسى "جاڭا" دەگەن ءسوزدى قوسادى. ەل بۇرىنعىداي بولمايدى، "جاڭا" بولادى. وعان تاڭعالۋدىڭ قاجەتى جوق. "جاڭا وزبەكستان", "جاڭا قاراقالپاقستان" دەگەن سوزدەردىڭ ءبارى مىندەتتى تۇردە ايتىلادى. بۇل كەز كەلگەن پرەزيدەنتتىڭ، كەز كەلگەن ساياساتكەردىڭ كلاسسيكالىق ءتاسىلى.
شاۆكات ميرزيوەۆتىڭ "جوسپارلانعان" پوزيتسياسى
بۇل ماسەلەنىڭ نۇكتەسى ەرتەرەكتە قويىلۋ كەرەك ەدى. مەنىڭ ەسىمدە، ۇمىتپاسام 93-94 جىلدارداعى كونستيتۋتسيا بويىنشا، قاراقالپاقستانعا جيىرما جىلدان كەيىن ءوزىنىڭ ساياسي باعىتىن انىقتايتىن تاڭداۋ بەرىلەتىن بولعان. سەبەبى، سول جىلداردا وتە قيىن كەزەڭ بولعاننىڭ وزىندە "بولەك شىعۋ" ماسەلەسى كوتەرىلگەن بولاتىن. بىراق، نەگە ەكەنى بەلگىسىز، 20 جىلدان كەيىن نە رەفەرەندۋم كوتەرىلمەدى، نە بۇل ماسەلە قايتا قوزعالمادى. ەگەر شاۆكات ميرزيوەۆ وسى باعىتتا شەشىم قابىلدايتىن بولسا، اۋەلى قاراقالپاق حالقىنا سول بۇرىنعى زاڭعا سايكەس، ەندى شەشىمگە كەلىڭدەر، 20 جىل ويلاندىڭدار عوي، جەكە مەملەكەت بولاسىڭدار ما، الدە ءبىزدىڭ قۇرامدا قالىپ، تاۋەلسىزدىگىن ۇستايتىن اۆتونوميا بولاسىڭدار ما، دەگەن ۇسىنىس ايتۋ كەرەك ەدى. ال ول كەرىسىنشى وسى ۇسىنىستاردى ايتپاستان، اتالعان باپتاردى الىپ تاستاي باستادى. بۇل - ۇلكەن قاتەلىك بولدى. اياعى قان توگىسكە ۇلاستى.
مەن كەيدە ويلايمىن. ارنايى جوسپارمەن حالىققا جاقسى كورىنۋى ءۇشىن وسىلاي باستايدى دا، "مەن كەلدىم", "حان كەلدى", "ماسەلەنى شەشىپ بەردىم" دەگەن ويمەن ادەيى جاسالعان دۇنيە سەكىلدى حالىققا قۇتقارۋشى سىندى كورىنىپ قالدى. ويتكەنى، الدىڭعى ماسەلەنى مەن بىلمەيمىن. بۇل ماسەلەنى رەفەرەندۋمنىڭ ءماتىنىن دايىنداعان ۋاقىتتا، اينالدىرعان وسى 4-5 باپتى الىپ تاستايمىز دەگەن ۋاقىتتا، ونى كىم جاساعانىن، كىمنەن شىققانىن بىلمەيدى ەكەنمىن. پارلامەنتتەن شىقتى ما، پرەزيدەنتتىڭ ءوز اۋزىنان ايتىلدى ما، ول - بەلگىسىز.
ميرزيوەۆتىڭ نەگىزگى ماقساتى...
ميرزيوەۆتىڭ نەگىزگى ماقساتى - قايتالاپ سايلانۋ مۇمكىندىگى (پۋتيندەگىدەي). حالىققا جاقسى كورىنۋ ارقىلى قايتادان سايلانۋ. بۇل قاراقالپاقستاندى وزىنە قوسىپ الۋدان دا ءبىرىنشى تۇرعان ماسەلە. جەكە باس قامى، جەكە رەپۋتاتسيانىڭ مۇنداي جەردە الاتىن ءرولى ۇلكەن. مەنىڭ سول جاقتاعى بەلسەندىلەرمەن سويلەسكەندەگى العان پىكىرىمە سۇيەنسەك، قاراقالپاقستاننىڭ ءبولىنىپ شىققانى دۇرىس. ول كەيىن قازاقستانعا قوسىلا ما، جوق پا، بۇل ماسەلە دە قايتا-قايتا قوزعالىپ جاتىر. قاراقالپاقستان ەندىگىدە ءوزى بىلەدى. جەكە مەملەكەت بولا ما، وزبەكستان قۇرامىنداعى تاۋەلسىز اۆتونوميا بولا ما، قازاقستاننىڭ جانىنداعى فەدەراتيۆتى قۇرىلىمعا قوسىلا ما، ونىڭ ءبارى - بولاشاقتىڭ ءىسى. ءدال قازىر ولار - ءبىر نارسەنى قورعاپ قالدى. ءوز تاۋەلسىزدىكتەرىن اياق استى ەتپەدى. وسى كۇش ءۇشىن، بىرلىك ءۇشىن، رۋح ءۇشىن حالىققا قوشەمەت!
وزبەكستان پرەزيدەنتىنىڭ "ساياسي توپتاردىڭ ارانداتۋشىلىعى" دەپ جىلى جابۋىنا قاتىستى
بۇل دا ءدال ءبىزدىڭ پرەزيدەنت ايتقانداي دۇنيە. سىرتتان كەلگەن ارنايى ارەكەت، بەلگىلى ءبىر ساياسي توپتار دەگەننىڭ بارلىعى قاڭتار وقيعاسىنا ۇقساس كلاسسيكالىق نۇسقا. بىراق، مەن ەشقانداي دا دالەل كورىپ وتىرعانىم جوق. اسىرەسە قاراقالپاقستاننان. ءيا، وپپوزيتسيالىق باعىتتاعى جەتەكشىلەردىڭ بولعانى، جەلەۋ بولعان، باستاپ بەرگەن ادامداردىڭ بولعانى راس. ونداي ادامدار بارلىق ەلدە بار. كوشەگە نارازىلىقپەن شىققان ادامداردىڭ ماقساتى ايقىن. ولاردى كورە تۇرا سىرتتان كەلگەن ارانداتۋشىلىق دەۋ - دۇرىس ەمەس.
اڭگىمەلەسكەن: دينا ليتپين،
"ادىرنا " ۇلتتىق پورتالى
