Özbekstanda oryn alǧan jaǧdaiǧa qatysty eldegı belsendı saiasatker Dos Köşımnen "Adyrna" tılşısı arnaiy pıkır aldy.
Nükıstegı köterılıstıŋ "Qaŋtar qyrǧynymen" ūqsastyǧy jaily
Mındettı türde ūqsastyq bolady. Sebebı, ekı eldegı halyqty köşege şyǧarǧan jaǧdaidyŋ baǧyty bır. Baǧyty - halyqtyŋ narazylyǧy. Sondyqtan da, eldıŋ basşysy "jaŋa" degen sözdı qosady. El būrynǧydai bolmaidy, "jaŋa" bolady. Oǧan taŋǧaludyŋ qajetı joq. "Jaŋa Özbekstan", "Jaŋa Qaraqalpaqstan" degen sözderdıŋ bärı mındettı türde aitylady. Būl kez kelgen prezidenttıŋ, kez kelgen saiasatkerdıŋ klassikalyq täsılı.
Şavkat Mirziioevtıŋ "josparlanǧan" pozisiiasy
Būl mäselenıŋ nüktesı erterekte qoiylu kerek edı. Menıŋ esımde, ūmytpasam 93-94 jyldardaǧy konstitusiia boiynşa, Qaraqalpaqstanǧa jiyrma jyldan keiın özınıŋ saiasi baǧytyn anyqtaityn taŋdau berıletın bolǧan. Sebebı, sol jyldarda öte qiyn kezeŋ bolǧannyŋ özınde "bölek şyǧu" mäselesı köterılgen bolatyn. Bıraq, nege ekenı belgısız, 20 jyldan keiın ne referendum köterılmedı, ne būl mäsele qaita qozǧalmady. Eger Şavkat Mirziioev osy baǧytta şeşım qabyldaityn bolsa, äuelı qaraqalpaq halqyna sol būrynǧy zaŋǧa säikes, endı şeşımge kelıŋder, 20 jyl oilandyŋdar ǧoi, jeke memleket bolasyŋdar ma, älde bızdıŋ qūramda qalyp, täuelsızdıgın ūstaityn avtonomiia bolasyŋdar ma, degen ūsynys aitu kerek edı. Al ol kerısınşı osy ūsynystardy aitpastan, atalǧan baptardy alyp tastai bastady. Būl - ülken qatelık boldy. Aiaǧy qan tögıske ūlasty.
Men keide oilaimyn. Arnaiy josparmen halyqqa jaqsy körınuı üşın osylai bastaidy da, "men keldım", "han keldı", "mäselenı şeşıp berdım" degen oimen ädeiı jasalǧan dünie sekıldı halyqqa qūtqaruşy syndy körınıp qaldy. Öitkenı, aldyŋǧy mäselenı men bılmeimın. Būl mäselenı referendumnyŋ mätının daiyndaǧan uaqytta, ainaldyrǧan osy 4-5 bapty alyp tastaimyz degen uaqytta, ony kım jasaǧanyn, kımnen şyqqanyn bılmeidı ekenmın. Parlamentten şyqty ma, prezidenttıŋ öz auzynan aityldy ma, ol - belgısız.
Mirziioevtıŋ negızgı maqsaty...
Mirziioevtıŋ negızgı maqsaty - qaitalap sailanu mümkındıgı (Putindegıdei). Halyqqa jaqsy körınu arqyly qaitadan sailanu. Būl Qaraqalpaqstandy özıne qosyp aludan da bırınşı tūrǧan mäsele. Jeke bas qamy, jeke reputasiianyŋ mūndai jerde alatyn rölı ülken. Menıŋ sol jaqtaǧy belsendılermen söileskendegı alǧan pıkırıme süiensek, Qaraqalpaqstannyŋ bölınıp şyqqany dūrys. Ol keiın Qazaqstanǧa qosyla ma, joq pa, būl mäsele de qaita-qaita qozǧalyp jatyr. Qaraqalpaqstan endıgıde özı bıledı. Jeke memleket bola ma, Özbekstan qūramyndaǧy täuelsız avtonomiia bola ma, Qazaqstannyŋ janyndaǧy federativtı qūrylymǧa qosyla ma, onyŋ bärı - bolaşaqtyŋ ısı. Däl qazır olar - bır närsenı qorǧap qaldy. Öz täuelsızdıkterın aiaq asty etpedı. Osy küş üşın, bırlık üşın, ruh üşın halyqqa qoşemet!
Özbekstan prezidentınıŋ "saiasi toptardyŋ arandatuşylyǧy" dep jyly jabuyna qatysty
Būl da däl bızdıŋ prezident aitqandai dünie. Syrttan kelgen arnaiy äreket, belgılı bır saiasi toptar degennıŋ barlyǧy Qaŋtar oqiǧasyna ūqsas klassikalyq nūsqa. Bıraq, men eşqandai da dälel körıp otyrǧanym joq. Äsırese Qaraqalpaqstannan. İä, oppozisiialyq baǧyttaǧy jetekşılerdıŋ bolǧany, jeleu bolǧan, bastap bergen adamdardyŋ bolǧany ras. Ondai adamdar barlyq elde bar. Köşege narazylyqpen şyqqan adamdardyŋ maqsaty aiqyn. Olardy köre tūra syrttan kelgen arandatuşylyq deu - dūrys emes.
Äŋgımelesken: Dina LİTPİN,
"Adyrna " ūlttyq portaly
Ūqsas jaŋalyqtar
