ىشكى ىستەر مينيسترلىگى بۇرىنعى قورعانىس ءمينيسترى رۋسلان جاقسىلىقوۆتىڭ قاماۋعا الىنعانى جونىندەگى اقپاراتقا بايلانىستى Kazinform اگەنتتىگىنىڭ رەسمي ساۋالىنا جاۋاپ بەردى.
«سۇراۋحاتتا كورسەتىلگەن ادامنىڭ قاماۋعا الىنعانى تۋرالى بۇقارالىق اقپارات قۇرالدارىندا كورىنەۋ جالعان اقپارات تاراتۋ فاكتىسى بويىنشا استانا قالاسىنىڭ پوليتسيا دەپارتامەنتى قىلمىستىق كودەكستىڭ 274-بابى 2-بولىگىنە (بۇقارالىق اقپارات قۇرالدارىن نەمەسە تەلەكوممۋنيكاتسيالار جەلىلەرىن پايدالانا وتىرىپ، كورىنەۋ جالعان اقپارات تاراتۋ) سايكەس سوتقا دەيىنگى تەرگەۋ جۇرگىزىپ جاتىر»، – دەلىنگەن مينيسترلىكتىڭ رەسمي جاۋابىندا.
سونىمەن قاتار، ۆەدومستۆو بۇل قىلمىستىق ءىستىڭ ناقتى كىمگە قاتىستى قوزعالعانىن جاريالاۋدان باس تارتتى.
«قر قىلمىستىق-پروتسەستىك كودەكسىنىڭ 201-بابىنا سايكەس، سوتقا دەيىنگى تەرگەپ-تەكسەرۋ دەرەكتەرى جاريا ەتىلمەۋى ءتيىس. تەرگەۋ جۇرگىزىلىپ جاتىر. انىق-قانىعى تەرگەۋ بارىسىندا انىقتالادى. باسقا مالىمەت بەرە المايمىز»، – دەپ حابارلادى مينيسترلىك.
ايتا كەتەيىك، رۋسلان جاقسىلىقوۆتىڭ قاماۋعا الىنعانى جونىندەگى اقپارات العاش رەت ءانونيمدى Telegram-ارنالاردا تارالىپ، كەيىن كەيبىر اقپاراتتىق پورتالداردا كوشىرىلىپ باسىلعان بولاتىن. بۇعان دەيىن باس پروكۋروردىڭ ورىنباسارى اسەت شىنداليەۆ تە بۇل ماسەلەگە قاتىستى پىكىر بىلدىرگەن ەدى.
