قازاقستان ۇلتتىق بانكى ازاماتتاردى جاڭا الاياقتىق سحەمالارعا بايلانىستى ساق بولۋعا شاقىردى، دەپ حابارلايدى "ادىرنا" ۇلتتىق پورتالى.
ۆەدومستۆو مالىمەتىنشە، الاياقتار وزدەرىن ۇلتتىق بانك، قۇقىق قورعاۋ ورگاندارى، ەكىنشى دەڭگەيلى بانكتەر نەمەسە بايلانىس وپەراتورلارىنىڭ قىزمەتكەرى رەتىندە تانىستىرۋدا. جالعان قۇجاتتار، رەكۆيزيتتەر، ءموبيلدى قوسىمشالار جانە الەۋمەتتىك جەلىدەگى فەيك پاراقشالار ارقىلى ازاماتتاردى الداپ، ولاردىڭ شوتتارىنا، دەپوزيتتەرىنە جانە ونلاين نەسيە راسىمدەۋگە قول جەتكىزۋگە تىرىسادى.
«الاياقتار سىزگە SMS-كود جىبەرۋدى، كۇماندى سىلتەمەلەرگە ءوتۋدى، بەلگىسىز قوسىمشالاردى جۇكتەۋدى سۇراۋى مۇمكىن.
مۇنىڭ بارلىعى ءسىزدىڭ تەلەفونىڭىزداعى جەكە اقپاراتقا زاڭسىز قول جەتكىزۋ ماقساتىندا جاسالادى»، – دەلىنگەن رەسمي حابارلامادا.
سونداي-اق، ۇلتتىق بانك رەسمي ورگان قىزمەتكەرلەرىنىڭ ازاماتتارعا اۋديو نەمەسە ۆيدەوقوڭىراۋ شالمايتىنىن، ينۆەستيتسيالىق جوبالارعا قاتىستى ۇسىنىستار جاسامايتىنىن، قارجىنى ساقتاندىرمايدى جانە حالىقپەن تىكەلەي اقشالاي ەسەپ ايىرىسپايتىنىن حابارلاعان.
ەگەر الاياقتاردىڭ ارباۋىنا تۇسكەن بولساڭىز، دەرەۋ قۇقىق قورعاۋ ورگاندارىنا ارىزدانۋ ۇسىنىلادى.
قوسىمشا اقپارات پەن كەڭەس الۋ ءۇشىن ۇلتتىق بانكتىڭ 1477 نومىرىنە حابارلاسۋعا بولادى.
