الماتى قالاسىنداعى سايران كولىنە ءجاسوسپىرىم مەن ەرەسەك ەر ادام باتىپ كەتتى. قايعىلى وقيعا 25 ماۋسىمدا بولدى، دەپ حابارلايدى «ادىرنا» ءتىلشىسى.
قالالىق تجد مالىمەتىنشە، 109 قىزمەتىنە ءجاسوسپىرىمنىڭ سۋعا كەتكەنى تۋرالى حابار تۇسكەن سوڭ، وقيعا ورنىنا سۇڭگۋىرلەر كەلىپ، 2007 جىلى تۋعان جىگىتتىڭ دەنەسىن سۋدان الىپ شىققان. ال ونىڭ قاسىنداعى تاعى ءبىر ءجاسوسپىرىم ءوز بەتىمەن جاعاعا ءجۇزىپ شىققان.
دەپارتامەنت سول كۇنى كەشكە 1977 جىلى تۋعان ەر ادامنىڭ دا باتىپ كەتكەنىن مالىمدەدى. كۋاگەرلەردىڭ ايتۋىنشا، مارقۇم ماس كۇيىندە بولىپ، تىيىم سالىنعان اۋماقتا شومىلىپ جۇرگەن.
توتەنشە جاعدايلار دەپارتامەنتى سايران كولىندە شومىلۋعا بارلىق قۇرىلىس، سانيتارلىق ءىس-شارالار اياقتالعانعا دەيىن جانە نىسان رەسمي پايدالانۋعا بەرىلگەنگە دەيىن قاتاڭ تىيىم سالىنعانىن حابارلادى.
«تىيىم سالۋ ءتارتىبى بۇزىلعان جاعدايدا قولدانىستاعى زاڭناماعا سايكەس ايىپپۇلداردى قوسا العاندا، ازاماتتارعا اكىمشىلىك ىقپال ەتۋ شارالارى قولدانىلاتىن بولادى. قالا تۇرعىندارى مەن قوناقتارىن سۋداعى قاۋىپسىزدىك ەرەجەلەرىن ساقتاۋعا، سونداي-اق رۇقسات ەتىلمەگەن جەرلەردە شومىلۋدان باس تارتۋعا شاقىرامىز»،—دەدى قالالىق تجد ءباسپاسوز قىزمەتى.
