قازاقستان مەن رەسەي شەكاراسىنداعى «جايسان» شەكارالىق باقىلاۋ-وتكىزۋ بەكەتىندە اۋىر جۇك كولىكتەرى كەپتەلىپ تۇر. بۇل تۋرالى توتەنشە جاعدايلار مينيسترلىگى ايتتى، دەپ حابارلايدى «ادىرنا» ءتىلشىسى.
كەپتەلىسكە شەكارادان ۆيزاسىز ءوتۋ ءۇشىن QR-كودتى مىندەتتى تۇردە پايدالانۋ جونىندەگى جاڭا ءتارتىپتىڭ ەنگىزىلۋى سەبەپ بولعان.
«مارتوك اۋدانىنداعى «جايسان» شەكارالىق باقىلاۋ-وتكىزۋ بەكەتىندە اۋىر جۇك كولىكتەرىنىڭ جينالۋى تىركەلدى.
وقيعا ورنىنا دەرەۋ قر توتەنشە جاعدايلار مينيسترلىگىنىڭ قۇتقارۋشىلارى مەن №20982 اسكەري ءبولىمىنىڭ اسكەري قىزمەتشىلەرى جىبەرىلدى.
قۇتقارۋشىلار تاراپىنان جۇرگىزۋشىلەرگە جەدەل كومەك ۇيىمداستىرىلدى. ىستىق تاماق، اۋىز سۋ بەرىلىپ، مەديتسينالىق كومەك كورسەتىلۋدە، سانيتارلىق باقىلاۋ جۇرگىزىلىپ، قاجەتتى اقپاراتتىق قولداۋ كورسەتىلۋدە»،—دەلىنگەن حابارلامادا.
مينيسترلىك جاعدايدىڭ تۇراقتى باقىلاۋدا ەكەنىن جەتكىزدى. جۇرگىزۋشىلەرگە قاجەتتى كومەكتى كورسەتۋ بويىنشا بارلىق شارالار ۋاقتىلى قابىلدانىپ، احۋالدى تۇراقتاندىرۋ جۇمىستارى جالعاسۋدا.
ايتا كەتەيىك، رەسەي 30 ماۋسىمنان باستاپ ۆيزاسىز رەجيممەن كىرەتىن تمد ەلدەرى ازاماتتارى ءۇشىن مىندەتتى ونلاين تىركەۋدى ەنگىزدى. قازاقستان ازاماتتارى، ونىڭ ىشىندە 6 جاستان اسقان بالالار، شەكارادان وتۋگە دەيىن كەمىندە 72 ساعات بۇرىن RuID قوسىمشاسىنا تىركەلىپ، ساۋساق ىزدەرىن تاپسىرۋى ءتيىس.
