شيەلى اۋدانىنىڭ شىعىسىنداعى قاراتاۋ جوتاسىندا ورنالاسقان ساۋىسقاندىق شاتقالىنداعى پەتروگليفتەر كەشەنى جويىلىپ كەتۋدىڭ الدىندا تۇر، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
بۇل تۋرالى اۋداندىق تاريحي-ولكەتانۋ مۋزەيىنىڭ عىلىمي قىزمەتكەرى بەكبولات ابۋتەگى مالىمدەدى.
473 گەكتار اۋماقتى الىپ جاتقان بۇل تاريحي كەشەندە ب.ز.د. ءىى مىڭجىلدىققا جاتاتىن 8–10 مىڭعا جۋىق جارتاس سۋرەتى بار.
«بۇل بەينەلەر — ەجەلگى ادامداردىڭ تۇرمىس-سالتىن، نانىم-سەنىمىن، اڭشىلىق جانە شارۋاشىلىق ارەكەتتەرىن ايعاقتايتىن تاريحي دەرەك. بىراق بۇگىندە ولاردىڭ جاعدايى وتە ناشار. تابيعي فاكتورلار مەن وندىرىستىك ارەكەتتەر كەسىرىنەن پەتروگليفتەر ءبۇلىنىپ جاتىر»، — دەدى ابۋتەگى.
كەشەن ورنالاسقان ايماققا جاقىن ماڭدا ۆانادي كەنىن جارىلىس ارقىلى وندىرەتىن زاۋىت بار. سول جارىلىستار مەن تابيعي ەروزيا سالدارىنان جارتاس بەتتەرى سوگىلىپ، تاريحي تاڭبالار ءبۇلىنىپ جاتقانى حابارلاندى.
«ەگەر شۇعىل شارا قابىلدانباسا، الداعى 4–5 جىلدا 4 مىڭ جىلدىق تاريحىمىزدان ايىرىلىپ قالۋىمىز مۇمكىن»، — دەپ ەسكەرتتى مۋزەي قىزمەتكەرى.
