يتاليانىڭ Linea Tempo اتتى مامانداندىرىلعان جۋرنالىندا اباي قۇنانبايۇلى تۋرالى ۇلكەن ماقالا جاريالاندى، وندا قازاق اقىنىنىڭ الەمدىك ادەبيەتكە جانە قازاقستاننىڭ رۋحاني مۇراسىنا قوسقان ۇلەسى كەڭىنەن اشىلىپ كورسەتىلگەن. بۇل تۋرالى "24KZ" تەلەارناسى جاريالادى، دەپ حابارلايدى “ادىرنا”.
مالىمەت بويىنشا، ماقالانىڭ اۆتورى – يتاليالىق فيلولوگ، ادەبيەت ءپانىنىڭ وقىتۋشىسى فورەنتسا بوسكي.
«بۇگىنگى تاڭدا يتاليالىق قوعامدا جاڭا مادەنيەتتەر مەن پوەزيانى تانۋعا دەگەن زور قىزىعۋشىلىق بار. بۇل، بالكىم، تۇپنۇسقا شىعارمالاردىڭ ساپالى اۋدارمالارىنىڭ ارقاسى. ابايمەن دە وسىلاي بولدى – 2020 جىلى قازاقستان پرەزيدەنتى قاسىم-جومارت توقاەۆتىڭ باستاماسىمەن ونىڭ شىعارمالار جيناعى اۋدارىلعان ەدى. وسى ماقالا جاريالانعان جۋرنالدى مادەنيەتتانۋشىلار، پروفەسسورلار، مۇعالىمدەر وقيدى – ياعني مادەنيەتتى تەرەڭىرەك تانۋعا مۇددەلى جاندار. بۇل – ەۋروپالىق اۆتورلاردىڭ قازاقستاندىق مادەنيەتتى زەرتتەۋىنە تۇرتكى بولادى دەپ ويلايمىن»، – دەيدى فورەنتسا بوسكي.
فيلولوگتىڭ ايتۋىنشا، ونى ابايدىڭ فيلوسوفيالىق كەمەلدىگى، ءتىلىنىڭ دالدىگى مەن ويىنىڭ يرونياسى تاڭعالدىرعان. ەكى جىل بويى شىعارمالارىن زەرتتەگەن سوڭ، اۆتور ابايدىڭ تۋىندىلارى شىعىستىڭ اۋىزشا پوەتيكالىق ءداستۇرىن قازىرگى ەۋروپالىق فيلوسوفيامەن شەبەر ۇشتاستىراتىنىن اتاپ وتەدى.
«ەۋروپالىق وقىرمان ءۇشىن ابايدىڭ شىعارماشىلىعى الىس، ءتۇرلى-ءتۇستى، ەۋروپالىق شىندىقتان وزگەشە، بىراق سونىمەن قاتار كوشپەلى حالىقتىڭ الەمىنە، دالا بولمىسىنا جاقىنداتادى. ونىڭ بۇكىل شىعارماشىلىعىنىڭ وزەگىندە – ادامگەرشىلىككە ۇندەيتىن ءۇن بار. بۇل – بارلىق حالىقتار مەن ەلدەردى بىرىكتىرەتىن ورتاق نارسە، جانە ول ارقاشان وزەكتىلىگىن جويمايدى. ويتكەنى “اقيقاتتىڭ نۇرىن كورۋ ءۇشىن – كوكىرەك كوزى كەرەك”. اباي ءدال وسىلاي جازادى»، – دەيدى بوسكي.
ماقالانىڭ العاشقى بولىمىندە ابايدىڭ بالالىق شاعى، وتباسىنىڭ اسەرى، ءبىلىمى جانە قازاق ادەبي ءتىلىنىڭ قالىپتاسۋىنا قوسقان ءرولى تۋرالى باياندالعان. ال ەكىنشى بولىمىندە اقىننىڭ پوەتيكالىق تاسىلدەرىنە تالداۋ جاسالادى، ول يتاليانىڭ تانىمال اعارتۋشىلىق جۋرنالدارىنىڭ كەلەسى سانىندا جارىق كورەدى.
